МакедонијаСиндикат

СОНК: КОНТИНУИРАН ДИЈАЛОГ И КОНКРЕТНИ ЗАЛОЖБИ ЗА УНАПРЕДУВАЊЕ НА ПРАВАТА И РАБОТНИТЕ УСЛОВИ НА ВРАБОТЕНИТЕ ВО ДЕТСКИТЕ ГРАДИНКИ

Фејсбук статус на СОНК:

КОНТИНУИРАН ДИЈАЛОГ И КОНКРЕТНИ ЗАЛОЖБИ ЗА УНАПРЕДУВАЊЕ НА ПРАВАТА И РАБОТНИТЕ УСЛОВИ НА ВРАБОТЕНИТЕ ВО ДЕТСКИТЕ ГРАДИНКИ

Денес, претседателот на СОНК, Стојко Рамов, оствари значајна работна средба со претседателите на синдикалните организации од детските градинки во Република Македонија, посветена на актуелните состојби, системските предизвици и приоритетните прашања што непосредно ги засегаат вработените во установите за предучилишно воспитание, образование и згрижување на децата. Во конструктивна и отворена дискусија беа разгледани бројни прашања од суштинско значење за остварувањето на работничките права, професионалниот статус, условите за работа и квалитетот на предучилишната дејност.

Посебен акцент беше ставен на потребата од отворање на Законот за заштита на децата и иницирање соодветни законски измени и дополнувања, особено во делот на систематизацијата и дефинирањето на работните места, статусот на приправниците, менторството, професионалниот развој и напредувањето на вработените. Како особено значајни беа посочени и прашањата поврзани со бројот на деца во воспитните групи, нормативите и стандардите за работа, исплатата на платите, организацијата и времетраењето на работното време, како и низа други проблеми и предизвици со кои вработените секојдневно се соочуваат во практиката. Претседателите на синдикалните организации имаа можност непосредно да ги презентираат конкретните состојби и проблеми од своите установи, со што беше овозможено сеопфатно согледување на реалните потреби и утврдување на приоритетите за понатамошно синдикално дејствување. Претседателот на СОНК, Стојко Рамов, истакна дека сите детектирани проблеми и предложени решенија ќе бидат изнесени на претстојната средба со министерот за социјална политика, демографија и млади, со јасно барање за нивно приоритетно разгледување и преземање конкретни мерки за надминување на постојните состојби. СОНК останува доследен на својата определба дека заштитата на работничките права не смее да се сведе само на декларативни заложби, туку мора да резултира со конкретни институционални решенија, унапредена законска регулатива и достоинствени услови за работа. Вработените во детските градинки се носители на една од најодговорните општествени дејности, грижата, воспитанието и образованието на децата во најзначајниот период од нивниот развој. Затоа, унапредувањето на нивниот професионален и материјален статус не претставува само прашање на работнички права, туку и суштинско прашање на квалитетот и одржливоста на целокупниот систем на предучилишно воспитание и образование. СОНК и понатаму ќе биде силен, принципиелен и истраен застапник на интересите на своето членство, со јасна определба дека секој аргументиран проблем заслужува институционално внимание, а секое оправдано барање – конкретен одговор и решение. Силни работнички права, достоинствени услови за работа и професионално вреднувани вработени се темел на квалитетно предучилишно воспитание и образование.