СИНДИКАТИТЕ ТВРДАТ ДЕКА НА ПРОТЕСТИТЕ ВО ФРАНЦИЈА УЧЕСТВУВАЛЕ 500.000 ЛУЃЕ, МВР ОБЈАВИ СОСЕМА ПОИНАКВИ БРОЈКИ
Големи протести ја зафатија Франција, откако синдикатите организираа демонстрации со барање за зголемување на платите во јавниот сектор. Според синдикатите, на протестите учествувале повеќе од 500.000 луѓе, додека француското Министерство за внатрешни работи соопшти дека бројката изнесува 146.000 демонстранти.
Општата конфедерација на трудот (CGT) соопшти дека во вторникот, на протестите организирани низ Франција, учествувале повеќе од 500.000 луѓе, од кои околу 175.000 во Париз.
Од друга страна, според податоците на француското Министерство за внатрешни работи, на демонстрациите низ земјата излегле 146.000 граѓани, од кои 28.000 во главниот град, пренесува телевизијата БФМ.
Француското Министерство за јавни служби регистрирало помалку од три отсто од државните службеници кои учествувале во штрајкот. Станува збор пред сè за вработени во министерствата, префектурите и регионалните образовни институции.
За споредба, на протестите одржани на 5 ноември, во штрајкот учествувале речиси 10 отсто од вработените во јавниот сектор.
Синдикатите бараат итно зголемување на платите
Француските синдикати бараат итно и општо зголемување на платите, особено во јавниот сектор, како и нивно усогласување со растот на инфлацијата.
Меѓу главните барања е и зголемување на вредноста на индексниот бод, врз основа на кој се пресметуваат платите на вработените во јавните служби. Неговата вредност е замрзната веќе четврта година по ред.
Синдикатите предупредуваат дека зголемените трошоци за живот ја намалиле куповната моќ на вработените, а голем број работници во јавниот сектор имаат основна плата пониска од минималната заработувачка.
Тие сметаат дека досегашните разговори со француската влада не донеле конкретни резултати.
Владата најави едномесечни разговори
Францускиот премиер Себастијан Лекорни најави едномесечни разговори во пет области, меѓу кои и итни мерки за зголемување на најниските плати.
Сепак, синдикатите инсистираат на општо зголемување на примањата за вработените, а не само на корекции на најниските плати.
Разликите во податоците за бројот на учесници на протестите повторно го отворија прашањето за обемот на незадоволството во францускиот јавен сектор, кој бара подобри услови за работа и повисоки примања.
Извор: Novosti.rs

