Вештачката интелигенција ги менува компаниите: Следува нов бран отпуштања во технолошкиот сектор во светот

Големите компании од Волстрит и Силиконската долина сè почесто ја користат вештачката интелигенција како дел од своите стратегии за намалување на трошоците и зголемување на ефикасноста, што носи и нов бран отпуштања на вработени.

Според Business Insider, инвестициската банка Голдман Сакс воведува нов модел на постепени отпуштања кој започнал во април и ќе трае во текот на повеќе месеци. Наместо еднократни кратења на работни места, какви што компанијата спроведуваше во минатото, сега менаџерите добиваат поголема автономија за носење одлуки, а отпуштањата се реализираат во фази.

Во меѓувреме, Ројтерс објави дека Мета разгледува можност за намалување на повеќе од 20 проценти од својата работна сила, што би можело да значи отпуштање на околу 16.000 вработени. Компанијата веќе подготвува планови за намалување на трошоците, додека истовремено инвестира милијарди долари во инфраструктура и развој на модели базирани на вештачка интелигенција.

Ова би претставувало најголемо реструктурирање во Мета од 2022 година наваму, но овојпат главната причина не е економската неизвесност, туку забрзаната примена на вештачката интелигенција.

Амазон веќе отпушти околу 16.000 луѓе. Оракл, пак, разгледува дополнителни намалувања на бројот на работници, а Епик Гејмс исто така отпушти повеќе од 1.000 вработени.

Заедничкиот фактор зад овие потези е сè поголемата улога на вештачката интелигенција во работењето на компаниите. Извршниот директор на Мета, Марк Закерберг, неодамна истакна дека големите тимови повеќе не се неопходни за реализација на сложени проекти, бидејќи современите технологии овозможуваат истата работа да се заврши со значително помал број луѓе.

Сепак, аналитичарите предупредуваат дека отпуштањата не се последица исклучиво на развојот на вештачката интелигенција. Дел од компаниите сè уште ги коригираат прекумерните вработувања направени за време на пандемијата, додека други се соочуваат со притисок од инвеститорите за зголемување на профитабилноста.

Експертите оценуваат дека пазарот на трудот влегува во нова фаза во која компаниите повеќе нема да растат преку масовно вработување, туку преку оптимизација на процесите и поголема продуктивност. Во такви услови, способноста за адаптација и стекнување нови вештини ќе стане клучен фактор за опстанок на работниците во дигиталната економија.