Возачите на лондонското метро најавија неколку штрајкови во март

Возачите на London Underground ќе организираат неколку 24-часовни штрајкови во текот на март, во знак на протест против предложените промени во работното време, соопшти британскиот Национален синдикат на железнички, поморски и транспортни работници RMT.

Планирани се шест штрајкови, од кои првиот е закажан за 24 март, се наведува во соопштението, пренесува британската новинска агенција Reuters.

Според предложениот план, работното време на возачите би се консолидирало во четиридневна работна недела, што синдикатот RMT го оценува како потенцијален безбедносен ризик.

„Овие предлози предизвикуваат сериозна загриженост во однос на заморот, безбедноста и балансот меѓу работата и приватниот живот“, изјави генералниот секретар на синдикатот Еди Демпси.

Тој додаде дека сè уште има време управата на лондонското метро да постигне одржливо решение.

„Сè уште има време лондонското метро да постигне одржливо решение, но ќе ги реализираме овие штрајкови доколку не успееме да обезбедиме договорен компромис“, изјави Демпси.

Извор: N1