ШТРАЈКОВИ ВО ЛОНДОНСКОТО МЕТРО ПРЕД БОЖИЌ: Машиновозачите најавија осум 24-часовни прекини на работата

Машиновозачите во лондонското метро најавија осум 24-часовни штрајкови во наредните месеци поради спор околу условите за работа. Синдикатот РМТ соопшти дека прекините би можеле сериозно да го нарушат јавниот превоз во пресрет на Божиќ и за време на новогодишните празници.

Штрајковите се најавени за 26 ноември, 17 и 19 декември, 4 и 6 јануари, како и за 17, 23 и 25 февруари 2027 година.

Прекините на работата ќе започнуваат напладне во секој од наведените денови и ќе траат по 24 часа, пренесува „Лондон ивнинг стандард“.

До најавата за штрајкови дојде по повеќемесечни преговори меѓу синдикатот РМТ и лондонската транспортна управа (TfL) околу предлогот за воведување четиридневна работна недела за машиновозачите во метрото.

Генералниот секретар на синдикатот РМТ, Еди Демпси, изјави дека транспортната управа се обидува да ги претстави промените како доброволно воведување четиридневна работна недела, иако, според него, тие би значеле укинување на постојните заштити и права на вработените.

„Нема ништо доброволно во програма што од машиновозачите бара да се откажат од постојните заштити, без оглед на тоа дали работат четири или пет дена, а на оние што ќе одбијат да ги прифатат промените им се заканува преместување“, изјави Демпси.

Тој додаде дека од вработените се бара да прифатат промени што би можеле да влијаат врз нивните работни услови и постојните права.

Најавените штрајкови би можеле да предизвикаат сериозни проблеми во функционирањето на лондонскиот јавен превоз, особено во периодот пред Божиќ, кога бројот на патници традиционално се зголемува.

Извор: Политика