Позната продавница ги затвора вратите: Се гасат 50 филијали

Германскиот текстилен дисконт KiK најави затворање на 50 продавници во првиот квартал од 2026 година.

На прв поглед, ова можеби не звучи драматично, со оглед на тоа што компанијата располага со повеќе од 4.200 продавници во 14 земји. Сепак, пораката е јасна – дури и евтината мода повеќе не е целосно безбедна, пренесува магазинот Fenix.

Од вкупно 50 филијали што ќе бидат затворени, 25 се наоѓаат во Германија. Компанијата ја потврди информацијата за германските медиуми, објаснувајќи дека станува збор за економски слаби локации.

Истовремено, се планира отворање на девет нови филијали, од кои една исто така ќе биде во Германија. Тоа значи дека не станува збор за повлекување од пазарот, туку за реорганизација. KiK има седиште во Бенен, во сојузната покраина Северна Рајна-Вестфалија, и е дел од Tengelmann Group. Самото име KiK доаѓа од слоганот „Kunde ist König“ – купувачот е крал. Во реалноста, изгледа дека трошокот сега е крал.

Уште минатата година компанијата соопшти дека ја преиспитува својата деловна структура. Тогаш се зборуваше за затворање на непрофитабилни локации, па дури се појавија и гласини за троцифрен број затворања. Засега бројката останува на 50, но нема гаранции дека тука ќе застане. Според стручниот весник Lebensmittel Zeitung, околу 400 филијали низ Европа се сметаат за проблематични. Во Германија, наводно, околу 170 продавници работат со загуба или се на раб на затворање. KiK не сакаше да ги потврди овие бројки, наведувајќи дека планирањето сè уште е во тек.

Покрај затворањата, се планираат и промени во работното време. Во Германија, во зависност од регионот, дури три од четири филијали би можеле да работат со изменет распоред. Се спомнува подоцнежно отворање и пократки вечерни смени. Причината е иста – намалување на трошоците за работна сила и зголемување на профитабилноста на послабите локации.

Слични мерки, наводно, се разгледуваат и во Шпанија и Португалија. Засега не се очекува вработените да останат без работа. Компанијата тврди дека на поголемиот дел од работниците од затворените продавници ќе им бидат понудени позиции во други филијали.

KiK вработува околу 32.000 луѓе, од кои приближно 19.000 во Германија.

Извор: b92.net