Светот добива сè повеќе милијардери: Овие три држави ќе бидат „расадник“ на нови богаташи
Бројот на милијардери во светот би можел да се приближи до цифрата од 4.000 до 2031 година, покажуваат податоците на консултантската куќа за недвижности „Knight Frank“, додека најбогатите во светот забрзано го зголемуваат својот имот.
Драстичен раст за само пет години
Според анализата на „Knight Frank“, моментално во светот има 3.110 милијардери. Се предвидува дека нивниот број ќе порасне за 25% во наредните пет години, достигнувајќи бројка од 3.915 екстремно богати поединци.
Паралелно со овој тренд, уште побрзо расте бројот на мултимилионери — лица чиј имот вреди најмалку 30 милиони долари. Нивната бројка пораснала од 162.191 во 2021 година на неверојатни 713.626 денес, што претставува зголемување од над 300%.
Вештачката интелигенција како „мотор“ на богатството
Лијам Бејли, директор за истражување во компанијата, објаснува дека енормното зголемување на богатството е директно поврзано со профитите во технолошкиот сектор.
„Можноста за ширење на бизнисот никогаш не била поголема. Тоа овозможува брзо создавање на големи богатства, со силно влијание на технологијата и вештачката интелигенција (AI)“, изјави Бејли за „Гардијан“.
Каде ќе „никнуваат“ новите милијардери?
Истражувањето издвојува три држави каде се очекува најексплозивен раст на бројот на најбогатите:
- Саудиска Арабија: Како земја богата со нафта, се очекува бројот на милијардери повеќе од двојно да се зголеми — од 23 во 2026 година на 65 во 2031 година.
- Полска: Исто така се предвидува двоен раст, при што бројот на милијардери ќе скокне од 13 на 29.
- Шведска: Скандинавската земја би можела да забележи раст од 81%, односно од 32 на 58 милијардери.
Јазот меѓу богатите и сиромашните сè подлабок
Додека бројот на милијардери расте, глобалната нееднаквост достигнува алармантни нивоа. Извештајот за глобална нееднаквост од минатата година откри фрапантен податок:
- Помалку од 60.000 луѓе (што е само 0,001% од светската популација) контролираат трипати повеќе богатство отколку целата најсиромашна половина на човештвото заедно.
Овие податоци само го потврдуваат трендот дека светското богатство сè повеќе се концентрира во рацете на многу мала група луѓе, придвижувана од новиот технолошки бран.
Извор: b92.net
