Сите се селат таму: Оваа земја издава најмногу работни дозволи во Европа
Според податоците на Европската канцеларија за статистика – Евростат, во 2023 година околу 89.000 работници надвор од Европската унија добиле т.н. „сина карта“, односно работна и престојна дозвола за висококвалификувани стручњаци од земји надвор од ЕУ.
Најголем дел од овие дозволи ги издала Германија – дури 69.000, што претставува 78 проценти од вкупниот број. Следи Полска со 7.000 (8%) и Франција со 4.000 (4%).
Кој добива најмногу „сини карти“?
Најмногу вакви дозволи добиле индиски државјани – 21.000, што е речиси четвртина (24%) од сите издадени. По нив следат руски државјани со 9.000 (11%), а тука се и работници од Турција (6.000) и Белорусија (5.000).
Германија се наоѓа на првото место кога станува збор за „увоз“ на работна сила – како висококвалификувана, така и за обични физички работи.
„На Германија ѝ се потребни најмалку 400.000 работници годишно, велат експертите“, пишува Tageszeitung.
Правило за Западен Балкан
Една од можностите за вработување во Германија е т.н. правило за Западен Балкан, кое беше воведено во 2015 година. Тоа овозможува граѓани од Албанија, Босна и Херцеговина, Црна Гора, Македонија и Србија да работат легално во Германија без да имаат формално образование или квалификација, доколку имаат понуда за работа и одобрение од Сојузната агенција за вработување.
Ова правило беше воведено за да се намали бројот на неуспешни барања за азил од овие земји и да се обезбеди регуларен пристап до германскиот пазар на труд. Од тогаш, бројот на барања за азил значително е намален, а работниците од Балканот главно се ангажирани во ресторани, хотели, градежништво и здравство.
Според податоците на платформата Jobbatical, до крајот на 2023 година, околу 76.000 државјани од Западен Балкан поседувале работни дозволи во Германија.
Нови квоти и неизвесна иднина
Под водство на канцеларот Олаф Шолц, од 1 јануари 2024 година, Германија ја зголеми квотата за работни визи од 25.000 на 50.000 годишно. Сепак, со изборот на новиот канцелар Фридрих Мерц, останува да се види дали оваа политика ќе продолжи или ќе биде ограничена.
Пренос на работници во рамки на компании
Во 2023 година, земјите членки на ЕУ издале вкупно 10.800 дозволи за пренос на работници во рамки на компании, што им овозможува на работници од трети земји да бидат испратени во филијала на компанијата во ЕУ.
Најмногу такви дозволи издале:
- Холандија – 2.700 (25%)
- Германија и Унгарија – по 1.900 (18%)
- Франција – 1.500 (14%)
- Шпанија – 1.100 (10%)
Најмногу од овие дозволи добиле државјани на Индија (3.900 – 36%), Кина (1.600 – 14%) и Јужна Кореја (1.300 – 12%).
Што се случува во САД?
САД годишно одобруваат околу 140.000 имигрантски визи за странци и нивните семејства, врз основа на нивните вештини. Овие визи се распределени во пет приоритетни категории, а во некои случаи е потребна трајна понуда за работа од американски работодавач, кој ќе поднесе барање до имиграциските власти во име на кандидатот.
Доналд Трамп на големо ги заостри политиките за имиграција – особено кон мигрантите од Мексико и други делови од Латинска Америка. Некои од неговите извршни наредби ја зголемија можноста на Имиграциската и царинската служба (ICE) да врши апсења, дури и во „чувствителни зони“ како училишта, болници и цркви, јави BBC.
Извор: b92.net
