ЕкономијаМакедонијаНовости

Стопанската комора со иницијатива за реформи во пет области за подобрување на економијата

   Време за читање 1 минута

Стопанската комора на Македонија денес го информираше претседателот Стево Пендаровски за иницијативата за потпишување Декларација за економски реформи, политики и мерки.  Според Стопанската комора треба да се делува во пет приоритетни области за да има стабилен и предвидлив економски амбиент.

„Претседателот Стево Пендаровски денеска прими делегација од Стопанската комора на Северна Македонија, предводена од претседателот на комората Бранко Азески и претставници од Асоцијацијата во Стопанската комора на Северна Македонија ТИМ-40. На средбата се разговараше за актуелните општествено – политички случувања во земјава и нивните влијанија врз економскиот амбиент, како и за заштита на интересите на бизнис заедницата“, информираат од кабинетот на претседателот Пендаровски.

Според претставниците на Стопанската комора оваа оваа иницијатива е поттикната од бавниот реален раст на македонската економија, кој од периодот од 1993 – та до 2021 – та година просечно годишно изнесува само 1,7 %.

„Претставниците на Комората изјавија дека постојат пет приоритетни области во нашата држава. Тие потенцираа дека за создавање на стабилен и предвидлив економски амбиент неопходно е решавање на сивата економија, корупцијата, гасификацијата, решавањето на проблемите со извозните компании, издавањето на дозволите за градба и регулирање на статусот на интернет порталите“, соопштија од кабинетот на Пендаровски.

Претседателот Пендаровски ја поддржа иницијативата и ги поздрави напорите на бизнис заедницата за  поттикнување на нови инвестиции, нови работни места и долгорочен одржлив економски раст и развој на земјата.

„Беше констатирано дека за унапредување на севкупните економски односи на државата потребно е решавање на сите отворени прашања преку дијалог и меѓусебна соработка“, соопштија од кабинетот на Пендаровски.