Ќе ти простат сѐ друго, но ова никако
Колумна на Бобан Илијевски
„Сѐ ќе ти простат, но успехот никако“. Често ја слушам оваа фраза последниве неколку години. До пред некое време, не сакав да верувам дека е точна, но за жал, сѐ повеќе и повеќе се потврдува дека е вистина.
Не знам, едноставно не ми доаѓа на памет зошто дел од народот не сака успешни луѓе. Дали е до менталитетот? Дали ги фрустрира тоа што некој постигнал успех, а тие не можат зашто чекаат од некој друг да им даде нешто? Или можеби е до тоа што се сеирџии, па обожаваат да гледаат кога некој ќе доживее неуспех за да скришно му се потсмеваат и го озборуваат?
Јас пак ги обожавам успешните луѓе. Тие се мојот доказ дека во една држава како Македонија може да се постигне резултат и дека не е сѐ „црно-бело“ како што некои велат.
Успешните луѓе ми даваат и мотивација да продолжам да го правам она што го правам и да не се откажувам од моите цели. Тие сведочат за тоа дека без разлика колку пати и да доживееш неуспех, да паднеш, треба да станеш и да продолжиш понатаму, колку и да е тешко и напорно.
Затоа ги почитувам успешните луѓе.
Неодамна на платформата YouTube најдов еден подкаст со наслов: „Како да успееш од Македонија“. Идејата на истиот е правење на интервјуа со успешни луѓе од Македонија. За да не откривам премногу ќе оставам линк подолу, па кој сака нека погледне. Сакам да разјаснам дека ова не е реклама, туку е поддршка за успешните луѓе од Македонија.
Најголемиот дел од нив не ги знаеме, бидејќи не се експонираат. А и зошто би се експонирале кога ќе бидат осудувани за постигнатиот успех од оние кои ќе најдат секаква можна замерка на истиот.
Линк од YouTube каналот: https://www.youtube.com/@ivan.nedelkovski
Фото: Freepik
- „Успехот“ на минатата Влада и оние пред неа: Над 32 % младинска невработеност, една од највисоките во Европа - 28/04/2025
- ГРАДЕЖНИШТВОТО ОДЗЕЛО НАЈМНОГУ ЖИВОТИ НА РАБОТНИЦИ ВО 2024 ГОДИНА – Еве во кои дејности имало најмногу повредени - 28/04/2025
- Справување со токсични колеги: Водич за одржување на разумот - 25/04/2025
