Вакцина против Ковид – 19 – Нов услов за вработување или задржување на работните места?

Со започнувањето на вакцинацијата се појавија многу прашања кои отвораат големи дискусии. Дали вакцинацијата ќе биде задолжителна, дали ќе биде услов за патување, и слично… Но јас отварам една друга, нова дилема, а тоа е: ДАЛИ ВАКЦИНИТЕ ВО ИДНИНА МОЖЕБИ ЌЕ БИДАТ УСЛОВ ЗА ВРАБОТУВАЊЕ ИЛИ ЗАДРЖУВАЊЕ НА РАБОТНО МЕСТО? Дали е возможно работодавачот да го услови продолжувањето на вашиот работен однос со примање на вакцина? Дали ни претстојат ситуации од типот вакцина или отказ?

Најпрво, согласно меѓународните норми, вакцинацијата претставува индивидуално право на избор на секој граѓанин, односно дали ќе ја прими или не истата. Националните законодавства согласно здравствената состојба во државата, регионот, континентот носат акционен план кои вакцини ќе се употребат и кои ќе бидат задолжителни. Ова право би можело да се дерогира само, и единствено ако станува збор за национален интерес односно заради зачувување на колективното здравје на општеството.

Согласно членот 41 од Законот за безбедност и здравје при работа предвидува дека вработените мораат да ги почитуваат пропишаните мерки за безбедност и здравје при работа и да ја користат пропишаната опрема за лична заштита и по употребата да ја вратат на соодветното место, како и да направат здравствени прегледи во согласност со овој закон и други прописи од оваа област. Дали можеме вакцинацијата да ја третираме како мерка за заштита при работа?

Законот за безбедност и здравје при работа предвидува дека вработените мораат да ги почитуваат пропишаните мерки за безбедност и здравје при работа, како и да направат здравствени прегледи во согласност со овој закон или други прописи од оваа област. Но, ВАКЦИНАТА, како таква НЕ МОЖЕ да биде сметана како мерка за безбедност и здравје при работа, имено таквите мерки се секогаш индивидуални и зависат од конкретниот случај, односно се однесуваат на точно утврдени ризици, на точно утврдени работни места.

Во таа насока можеме да кажеме дека не е возможно да биде предвиден општ услов како на пример задолжителна вакцинација од вирусот Ковид 19 за сите граѓани на Република Македонија кој би се применувал во работните односи. Секое условување од тој вид би било ПРОТИВЗАКОНИТО. Од дрга страна ниту работодавачите имаат правна можност со интерни акти да воведат посебен услов при вработувањето или задржување на работно место како што е вакцинација, заради одредбите од Уставот, како и анти- дискриминаторското законодавство во оваа област во земјата!

Проф. д-р Лазар Јовевски