Загрозена челичната индустрија во БиХ: 11.000 работници во неизвесност

Советот на министри на Босна и Херцеговина не ја усвои одлуката за воведување привремени заштитни мерки за увоз на челик, што, според Синдикатот на работници на Нова Железара Зеница, може сериозно да влијае врз околу 550 компании поврзани со овој индустриски гигант.

Одлуката не беше донесена и покрај протестот пред зградата на Советот на министри, каде што голем број работници на Железарата пристигнаа со автобуси од Зеница. Според медиумите, против гласаа министрите од ХДЗ.

„Станува збор за судбината на 11.000 работници. Денес ќе се повлечеме мирно и достоинствено, но ќе ги разгледаме нашите следни чекори. Ние им заработуваме плати, а тие ја сечат гранката на која седат – ова не е мудра одлука“, изјави Рашид Фетиќ, претставник на синдикатот.

Тој додаде дека во моментов приоритет е смирување на работниците, но дека наскоро ќе следи анализа на состојбата и можни идни активности.

Според него, Железарата има капацитет за работа до 15 мај, по што иднината станува неизвесна.

„Ова може да биде почеток на крајот не само за Нова Железара, туку и за ‘Железници на Република Српска’, ‘Железници на ФБиХ’ и уште околу 550 компании кои соработуваат со нас“, предупреди Фетиќ.

Барања за заштитни мерки, не субвенции

Директорот и косопственик на Нова Железара Зеница, Ахмед Хамзиќ, истакна дека компанијата не бара субвенции, туку воведување заштитни мерки какви што веќе постојат во европските земји.

Според него, ваквите мерки се неопходни за опстанок на пазарот и зачувување на целата индустрија.

И претставниците на железничките компании претходно апелираа до Советот на министри да ја усвои одлуката и да ја заштити домашната индустрија, предупредувајќи дека во спротивно ќе биде доведен во прашање опстанокот на повеќе претпријатија.

Од „Железници на ФБиХ“ нагласија дека евентуалното затворање на Железарата би имало сериозни последици за нивното работење.

„Без навремена поддршка, под знак прашање ќе бидат ставени работните места на 2.500 вработени, како и соработката со бројни партнери“, соопштија од компанијата, додавајќи дека веќе претрпеле загуби од 10 милиони конвертибилни марки поради затворањето на Коксарата во Лукавац.

Опасност од поширока економска криза

Слична реакција стигна и од „Железници на Република Српска“, од каде што повикаа на итни мерки за решавање на проблемот со железничкиот транспорт.

„Дури 11.000 работни места се директно загрозени од евентуалното запирање на производството во Нова Железара, а индиректно и десетици други. Сите тие зависат од оваа одлука“, изјави Драган Зеленковиќ, вршител на должност директор на компанијата.

Тој додаде дека неодобрувањето на заштитните мерки сериозно го загрозува опстанокот и понатамошното работење на бројни компании во Република Српска и Федерацијата БиХ.

Ситуацијата во челичната индустрија во БиХ, според експертите, може да има далекусежни последици врз економијата, доколку наскоро не се најде решение.

Извор: Nezavisne.com