Како бизнисмените ја оценуваат 2021ва?

2021 година за градежниот сектор во Македонија беше катастрофална, оценуваат дел од градежните компании од Прилеп. Прво затоа што овој сектор зависел од капиталните инвестиции на држава кои ги немало, а друго затоа што поради бирократијата не можеле да добијат градежни дозволи. За да не се повтори 2021-ва бараат надминување на оваа пречка за идната година.

„Од стравот кој што постои кај вработените во локалната самоуправа од ставање на потпис на се по закон изработена градежно-техничка документација. Зошто е тој страв? Бидејќи во претходниот период за се што потпишало претходното раководство и сите членови на тоа одделение за урбанизам, имаат и по 10-тина неосновани кривични пријави“, истакна Гордан Бошкоски, градежна компанија.

И за прехранбената индустија оваа година била тешка со големи поскапувања на репроматеријалите, суровините и амбалажата. Очекуваат дека и пост ковид периодот во 2022-ра ќе биде тежок, а за да се надмине зголемуњето на цените очекуваат помош од државата.

„Ако тоа се амортизира тогаш ние ќе можеме непречено да произведуваме и да ги задржиме оние постоечки цени од кои што сепак на крајот на денот ќе има бенефит и оној последен купувач во ланецот на испорака на нашата роба, а и нормално би се продавале и поголеми количини“, рече Владимир Трпаноски, прехранбена индустрија.

Дел од извозно ориентираните текстилни компании 2021 ја оценуваат добро, а очекуваат да се справат без проблем и со предизвиците во 2022 година.

„Успешно беше тоа што и во година на криза ги набавивме сите потребни репроматеријали во фабриката, да произведеме и да доставиме до купувачите и со тоа да ги обезбедиме сите проекти кои беа договорени за да имаме добар пат за 2022 година и да ги задржиме сите купувачи“, кажа Филип Велески, текстилен сектор.

Дел од компаниите шансата за успех во 2022-ра ја гледаат и во „Отворен Балкан“, создавање на Балканска стопанска комора и оформување на безцаринска зона.

Извор: Сител