Кај угостителите и работници без дозвола за престој и работа, во хрватскиот буџет половина милион евра казни

До почетокот на август 2025 година, поради сомнеж за сторени 368 прекршоци против работодавци – физички и правни лица, како и одговорни лица во правни субјекти – до судовите се поднесени 99 обвинителни предлози, а издадени се 181 прекршочен и задолжителен прекршочен налог.

Иако работодавците се жалат на недостиг од работна сила, особено во туристичката сезона, дел од нив и понатаму на штета на буџетот и работниците ги кршат законите – не уплаќаат придонеси за пензиско осигурување, а има и такви кои не се двоумат да ангажираат странски работници без дозвола за престој и работа во Хрватска.

Во рамки на координираните надзори на Државниот инспекторат, во периодот од 12 мај до 3 август 2025 година, инспекцијата на труд изврши 1286 контроли кај работодавци што се занимаваат со угостителска дејност – во хотели, кампови, ресторани, барови и други објекти низ целата земја, особено на крајбрежјето и на островите.

„При инспекциските надзори беше опфатена примената на прописите за труд и вработување, а најчесто беа утврдени прекршувања на Законот за странци, Законот за труд и Законот за пензиско осигурување. Се работеше за незаконито вработување државјани на трети земји без дозвола за престој и работа, неправилности во водењето евиденција за работниците, особено за работното време, неиздавање писмена потврда за склучен договор за работа пред почетокот на работниот однос (кога договорот не бил склучен во писмена форма), непријавување на работници во задолжителното пензиско осигурување во пропишаниот рок и други прекршоци,“ соопшти Државниот инспекторат.

До почетокот на август судовите добија 99 обвинителни предлози, издадени се 181 прекршочни налози, а донесени се и 164 управни мерки. Од нив, 89 решенија со кои на работодавците им е наложено да ги пријават работниците во пензиско осигурување и да уплатат во државниот буџет по 2650 евра, односно 6630 евра за секој непријавен работник. Според Законот за спречување на непријавена работа, работодавецот плаќа 2650 евра за секој непријавен работник, а ако при повторна контрола во рок од шест години повторно се утврди непријавена работа, казната изнесува 6630 евра по работник.

Инспекцијата на труд издаде и 57 решенија врз основа на Законот за странци, со кои на работодавците им беше привремено забрането вршење дејност во траење од 30 дена, поради незаконито ангажирање странски работници без дозвола за престој и работа или без потврда за пријава на работа. Усните решенија за забрана беа укинати за 50 работодавци кои во рок од три дена доставија доказ дека уплатиле во буџетот по 3981,68 евра за секој државјанин од трета земја.

До почетокот на август во државниот буџет се слеани вкупно 310.608 евра по основ на казни.

Извор: Vecernji.hr