Нема да им се крати од платите за боледување на здравствените работници заболени од Ковид -19

На заболените здравствени работници од Ковид-19 нема да им се крати од платата за боледувањата. Министерот за здраство Венко Филипче денеска на прес-конференција изјави дека во однос на боледувањето на здравствените работници, решението е најдено и тоа веќе ќе се имплементира преку измена во Правилникот на Министерството за труд и социјална политика.

Платата ќе биде целосно покриена, рече Филипче, најпрво од работодавецот првиот месец, а потоа и од Фондот кај сите кои се заболени од оваа болест третирајќи го како професионално заболување.

Во однос на партиципацијата за лекувањето, единствено можно решение беше измена во Програмата за партиципација во рамки на Министерството за здравство и тоа ќе биде направено во текот на следната недела, најави министерот за здравство.

Филипче одговораше на новинарско прашање во врска со јавните барања на одредени лекари, за инфирицираните медицински лица кои добиле кооронавирус на работа тоа да се третира како професионално заболување и да не им бидат одбивани пари од платите.

Филипче информираше и за состојбата на Клиниката за детски болести, каде имаше тројца вработени позитивни на КОВИД-19 вирусот, лаборант, медицинска сестра и докторка од Одделот за имунологија, сите без симптоми. Тој додаде дека по изминати 14 дена, првиот контролен брис кај лаборантот е негативен, другите тестирања ќе бидат готови во следните денови. Кај 23 лица, нивни контакти, после изолацијата од 14 дена се асимптоматски.