Образовна раскрсница: Блокада или минимум настава

По пролетниот распуст, дел од учениците се вратија во училишните клупи – но не сите. Додека во некои белградски гимназии наставата се одвива со скратени часови, на југот од Србија одредени училишта сè уште се во целосна блокада. Наставниците порачаа дека ги поддржуваат барањата на студентите, додека синдикатите нагласуваат дека незадоволството во образованието не стивнува.

Иако распустот заврши, продолжувањето на наставата не изгледа исто во цела Србија. Учениците се вратија делумно на училиште, но ефектите од студентските блокади сè уште се чувствуваат. Во белградските гимназии „Свети Сава“ и „Шеста београдска гимназија“ часовите се скратени, а учениците имаат и дополнителни часови за надокнада.

„Нашата идеја беше учениците да не ја изгубат учебната година, да не се доведе во прашање нејзината регуларност. Никој не вршел притисок врз нас – одлуката за поддршка на студентите ја донесовме самостојно. Родителите и учениците само прашуваа што ќе се случи“, изјави Урош Тепавац од синдикатот на Шестата белградска гимназија.

На југот на земјата, ситуацијата е поинаква. Во Ниш, според наставниците, половина од училиштата работат онлајн, додека Првата нишка гимназија „Стеван Сремац“ е целосно блокирана.

„Нашата гимназија е единствената што остана во целосен прекин на наставата во Ниш. Ние сме заедница од наставници, ученици и родители кои сакаат да поддржат отпор. Мал дел од наставниците се вратија поради егзистенцијални причини, но тоа е онлајн настава преку Google Meet, што мнозинството ученици ја бојкотираат“, вели Јелица Стошиќ, професорка по филозофија во гимназијата.

Од Независниот синдикат на просветни работници на Србија велат дека вработените се и натаму незадоволни. И покрај тоа што некои наставници се вратија на работа, тие сметаат дека ситуацијата не е суштински решена.

„Веќе трет месец ситуацијата во училиштата не е нормализирана, и нема да се нормализира само затоа што некои се вратиле на работа. Сè уште сме длабоко незадоволни. Именувањето на нов министер за образование, кој е под секое ниво на критериуми, само дополнително ја дестабилизира состојбата. Институциите го игнорираат она што се случува, па ќе мора наставниците, учениците и родителите заедно да најдат решение што ќе биде најдобро за учениците“, изјави Никола Ќурчин од синдикатот.

Извор: Nova