Работни услови во Европа: Помалку прекувремена работа, но жените и понатаму во неповолна положба

Резултатите од водечкото паневропско истражување на организацијата Eurofound покажуваат значителни подобрувања во квалитетот на работата во последната деценија, но истовремено нагласуваат големи разлики меѓу жените и мажите, како и драстично различни услови за работниците во одделни делови на Европа.

Истражувањето за работните услови во Европа 2024 се заснова на разговори со над 36.000 работници во 35 земји. Податоците се мерат преку седум индикатори за квалитетот на работата, а првите објавени наоди истакнуваат неколку клучни прашања:

🔹 Прекувремената работа е сè поретка
Уделот на работници кои работат повеќе од 48 часа неделно опадна од 19% на 11% од 2005 година. Овој тренд помогна во намалување на родовиот јаз во квалитетот на работното време, па така Индексот за квалитет на работното време кај мажите во 2024 година конечно го достигна нивото на жените.

🔹 Физичкото работно опкружување подобрено
Од 2010 година мажите почувствувале побрзо подобрување. Работниците известуваат и за поголеми можности за развој и примена на вештини, при што Индексот на вештини и дискреција бележи најголем напредок меѓу нефинансиските домени. Сепак, под овие позитивни промени се кријат големи разлики – работното опкружување за жените се влошува.

🔹 Социјалното опкружување
Овој показател, кој го мери квалитетот на социјалните односи на работното место, се влошил за жените од 2010 година, додека кај мажите се подобрил. Причината е поголемата изложеност на жените на вербално вознемирување и други негативни социјални однесувања.

🔹 Интензитетот на работа
Индексот се подобрил за мажите, но се влошил за жените, кои почесто работат во сектори како здравство и образование – обележани со чести прекини и високи емоционални барања.

🔹 Работата во Европа станува седење
Дури 40% од работниците во Европа поголемиот дел од времето го минуваат седејќи, што е поврзано со ризици како дебелина, висок крвен притисок и покачен холестерол. Жените се повеќе погодени (42%) отколку мажите (39%).

Истражувањето укажува и на сериозни нееднаквости во сигурноста на работата и предвидливоста на платите. И покрај општиот пад на стравот од губење работа, родовиот јаз во кариерните можности и понатаму изнесува шест процентни поени во корист на мажите. Дополнително, 15% од работниците не можат да предвидат колкава ќе им биде платата во следните три месеци.

Најголема неизвесност има во земји како Романија и Грција, каде повеќе од четвртина работници не знаат колкава ќе им биде заработката, за разлика од Австрија и Германија каде што владее релативна сигурност.

Првите наоди од истражувањето потврдуваат дека квалитетот на работата во Европа генерално се подобрува, но користа не е еднакво распределена. Анализата укажува дека носителите на одлуки мора да гледаат подалеку од општите трендови и да се фокусираат на специфичните ранливости и нееднаквости кои сè уште го обликуваат животот на работниците.

Извор: BIZLife.rs