Шаќири: Математичарот Амир е потврда дека на талентираните деца им треба лична волја за успех и посветени наставници кои ќе ги постават во центарот на внимание

Младиот Амир покажа дека ниедна животна препрека не може да те спречи во желбата да успееш во тоа што го сакаш и во што ќе вложиш многу труд. Нам, како претставници на државата, ни останува да го поддржиме во неговата лична борба за повисоко образование и остварување на потенцијалите, што несомнено ги поседува.

Ова го кажа министерот за образование и наука Јетон Шаќири по средбата со Амир Дестанов од ОУ„Браќа Рамиз Хамид“, кој и покрај тешкото детство успева да стекне основни знаења за математиката, да ја засака и упорно да навлегува во нејзините тајни, за сега и на натпревари со врсниците, да покаже дека е одличен во решавање математички проблеми.

„Амир е наша гордост. Неговите резултати по математика се уште позначајни, затоа што нема исти услови за учење како другите деца. Амир, и другите талентирани деца, заслужуваат разбирање, внимание и целосна системска поддршка. Ние сме мала земја која треба да ги негува своите талентирани деца. Ова е посебно важно за надарените деца, кај кои семејната грижа ја нема или е недоволна, но затоа имаат цврста волја да ги надминат состојбите во кои се наоѓаат и да го постигнат максимумот од личните можности“, нагласи министерот Шаќири.

Тој посебно се заблагодари на наставниците од основното училиште и од Дневниот центар за деца од улица, за големата љубов и посветеност да се грижат и да работат со Амир, со што го потврдуваат ставот дека кога децата ќе станат центар на наставничкиот универзум, тогаш секој успех станува можен.

На состанокот присуствуваше и Арабела Илјаз од Министерството за образование и наука која е координатор на процесот за креирање и имплементација на ромски образовни политики.

Министерството за образование и наука ќе продолжи да ги развива политиките за поддршка на талентираните ученици, преку обезбедување на нови и дополнителни можности за развој на нивниот потенцијал, покрај можностите кои и сега се достапни за стекнување на правото за користење на одредена категорија на стипендија и други парични надоместоци, можности за побрзо напредување и преминување од едно во друго одделение, поддршка преку покривање на трошоците за учество на меѓународни натпревари и олимпијади, можности за едукација во новоотворената Математичко – информатичка гимназија во Скопје, како и доделување средства преку Фондот за иновации и посебни програми креирани во соработка со меѓународни партнери и организации.