Ако не користите вештачка интелигенција, дали сте следни на списокот за отказ?
Замислете ситуација во која се јавувате на телефон за закажано интервју за работа, а од другата страна ве пречекува роботски глас. Наместо само да ве поврзе со регрутер, ботот почнува да ве прашува за вашите вештини и работно искуство.
Иако звучи како сценарио од научно-фантастичен филм, ваквата практика станува сè почеста. Истражувањата покажуваат дека дури две третини од кандидатите во САД веќе имале искуство со интервјуа со помош на вештачка интелигенција.
Сепак, реакциите на кандидатите се далеку од позитивни, пишува CNBC Make It.
Речиси четири од 10 кандидати изјавиле дека се откажале од понатамошниот процес на селекција во моментот кога наместо со човек биле ставени во контакт со бот. Дел од нив дури ги ставаат компаниите кои користат ваков пристап на своевидна „црна листа“.
Студено, непријатно и полно со грешки
Главната забелешка на кандидатите е целосното отсуство на човечкиот фактор.
Алатките со вештачка интелигенција често звучат неприродно, не реагираат соодветно на динамиката на разговорот, а во некои случаи го прекинуваат соговорникот на средина на реченица или поставуваат исти прашања повеќе пати.
Уште поголем проблем претставуваат техничките и етичките ризици.
- Софтверите за анализа на лицето и движењето на очите може да ги стават во понеповолна положба кандидатите со здравствени проблеми или специфичности во однесувањето.
- Истражувањата укажуваат дека алгоритмите можат да покажат пристрасност врз основа на раса, пол или возраст.
- Ако компанијата штеди на човечкиот контакт уште на почетокот од процесот, кандидатите се прашуваат каков третман би можеле да очекуваат доколку бидат вработени.
Притисок врз регрутерите и привидна заштеда на време
Од друга страна, регрутерите се соочуваат со голем притисок. Поради огромниот број апликации и барањата на менаџментот работните позиции да се пополнат што побрзо, дел од компаниите првиот круг на селекција го препуштаат на ботови.
Иако 70 отсто од менаџерите велат дека вештачката интелигенција им помага побрзо да донесуваат одлуки, само еден од 10 кандидати смета дека ВИ го прави процесот на вработување поправеден.
Експертите предупредуваат дека компаниите забораваат на една клучна работа – кандидатите исто така ги оценуваат компаниите во текот на процесот на вработување.
Ако селекцијата се сведе на тоа ВИ алатките на регрутерите да разговараат со ВИ алатките на кандидатите кои ги пишуваат нивните биографии, тогаш се губи суштината на процесот на вработување.
Човечките ресурси, потсетуваат експертите, со причина во својата суштина го имаат зборот – човек.
Извор: BIZLife/K. J.
