Германската Allianz планира да замени 1.500 работници со вештачка интелигенција
Филијалата на Allianz, најголемата германска осигурителна компанија, планира да замени дел од своите вработени со вештачка интелигенција, објави Süddeutsche Zeitung.
Станува збор за Allianz Partners, компанија специјализирана за патничко и авто-осигурување. Според извештајот, компанијата планира рутинските и едноставни барања кои моментално ги обработуваат вработените во кол-центрите да ги префрли на AI систем, пренесува DPA.
Од Allianz Partners засега ниту ги потврдуваат, ниту ги демантираат овие информации. „Сè уште сме во рана фаза на тестирање на промените и допрва треба да видиме во кој правец ќе нè одведат“, изјави претставничка на компанијата, без дополнителни детали.
Според весникот, планираната автоматизација може да влијае врз работни места во повеќе земји. Allianz Partners моментално има 22.600 вработени, од кои 1.600 се во Германија.
Дискусијата за тоа како дигитализацијата и автоматизацијата го менуваат финансискиот сектор и ја намалуваат потребата од човечки труд трае веќе со години.
За споредба, Allianz групацијата со седиште во Минхен во последната деценија вработила околу 9.000 луѓе, а до крајот на 2024 година имала вкупно 156.626 вработени ширум светот.
