Екс-ју гигант се продава преку оглас: Некогашниот симбол на југословенската индустрија „на продажба“

Фабриката за хартија во Белишќе започнала со работа во 1960 година, а производството официјално било прекинато во ноември минатата година.

Откако беше затворена, некогашната фабрика за хартија во Белишќе сега се продава за 19 милиони евра. Просторот на поранешната фабрика го продава компанијата DS Smith, која фабриката во Белишќе ја презеде во 2015 година.

Од компанијата уверуваат дека нивната фабрика за производство на амбалажа во Белишќе и понатаму работи, а во неа во моментов се инвестираат 15 милиони евра.

Сепак, вниманието на јавноста го привлече огласот објавен на интернет-платформата Njuškalo, преку кој се продава голем индустриски комплекс со површина од 255.000 квадратни метри.

Станува збор за целосна индустриска локација со постоечки објекти, развиена инфраструктура и сите потребни приклучоци, што на идниот инвеститор му овозможува брза пренамена на просторот и започнување ново производство, пренесува „Вечерњи лист“.

Комплексот се наоѓа во индустриската зона во Белишќе, на локација која со децении беше синоним за индустријата за хартија и економскиот развој на градот.

Индустриски комплекс со голем потенцијал

Огласот е објавен преку компанијата CBRE, една од најголемите светски компании за комерцијални недвижности и инвестиции.

Во продажбата се вклучени 13.725 квадратни метри затворен простор, меѓу кои работилници, производствени хали и објект за подготовка на суровини.

Во огласот е наведено дека индустриската опрема ќе биде отстранета пред продажбата, што ќе му овозможи на новиот сопственик да го прилагоди просторот според сопствените потреби.

Локацијата располага и со развиена инфраструктура со висок капацитет, што значително може да го намали времето и трошоците за евентуална пренамена или започнување ново производство.

Како посебна предност се наведуваат силните енергетски и гасни капацитети, поради што просторот е погоден и за енергетски интензивни проекти, како што се индустриско производство или центри за податоци.

Фабриката во Белишќе со децении беше еден од симболите на индустрискиот развој во поранешна Југославија, а нејзиното затворање означи уште еден пример за трансформацијата на традиционалната индустрија во регионот.

Извор: b92.net