Ера на бизарни работни односи: Како вештачката интелигенција создава хаос и нетрпеливост меѓу колегите
Додека директорите и технолошките гиганти најавуваат светла иднина на бизнисот благодарение на вештачката интелигенција, на секојдневно ниво се случува нешто сосема спротивно – ВИ почнува сериозно да ги нарушува меѓучовечките односи на работното место.
Од ботови кои ги филтрираат мејловите толку агресивно што соработниците повеќе не можат да дојдат до своите колеги, па сè до работници кои наместо да разговараат меѓусебно, едни со други им велат да „го прашаат ChatGPT“, работните места стануваат полигон за нов вид фрустрации и недоверба.
Сомнеж и обвинувања: „Ти ли го смисли ова или твојот бот?“
Експлозијата на употребата на ВИ алатките без јасни интерни правила создаде атмосфера на општа сомничавост.
Според неодамнешните истражувања, повеќе од 80 отсто од вработените користат ВИ без каква било официјална обука, додека повеќето компании воопшто немаат дефинирана политика за употреба на овие алатки, пишува CNBC.
Резултатот е парадоксален – вработените од раководството добиваат пораки да работат „побрзо и попаметно“, додека во исто време колегите ги гледаат со потсмев и ги обвинуваат дека се мрзливи.
Посебен проблем претставува појавата на таканаречениот „работен шунд“ (workslop) – текст или содржина која на прв поглед изгледа професионално и паметно напишана, но во суштина претставува празна обвивка полна со грешки.
Истражувањата покажуваат дека дури 40 отсто од канцелариските работници редовно добиваат ваква содржина од своите колеги. Тоа им создава дополнителна работа, бидејќи трошат часови на проверка и исправување на грешките, а истовремено предизвикува и директни финансиски загуби за компаниите.
Кога ВИ станува посредник во комуникацијата
Сè поголем број менаџери и вработени ја користат вештачката интелигенција како „посредник“ во комуникацијата со тимот.
Кога вработен ќе постави прашање, наместо одговор од искусен колега или менаџер, сè почесто добива упатување да го побара одговорот од бот.
Експертите за човечки ресурси предупредуваат дека вработените ваквиот пристап можат да го доживеат како навредлив.
„Човечката поврзаност не е спротивност на продуктивноста“, покажуваат истражувањата на Универзитетот Стенфорд и Универзитетот Оксфорд.
Според нив, кога менаџерите ја користат ВИ како замена за менторски разговори и кариерно насочување, желбата на вработените да дадат отказ се зголемува за 29 %, додека нивото на согорување на работното место (burnout) се зголемува за една четвртина.
Технологијата ги открива старите слабости
Новите технологии не создаваат целосно нови проблеми во работното опкружување. Наместо тоа, тие на нов начин ги исфрлаат на површина старите слабости – недостатокот на дипломатија, лошата комуникација и површноста.
Иако ВИ алатките можат да направат речиси секој да звучи како „најречитата личност на светот“, зад совршено формулираните реченици понекогаш останува само куп фрази без вистинска содржина.
Во таква средина, најголемиот предизвик за компаниите можеби нема да биде како да ја воведат вештачката интелигенција, туку како да се погрижат таа да не стане замена за човечката комуникација.
Извор: BIZLife
