ЕТУК: Директивата за минимална плата конечно е потврдена – но потребни се посилни правила за соодветноста на платите

Европската конфедерација на синдикати (ЕТУК) ја поздравува одлуката на Судот на правдата на ЕУ со која Директивата за минимална плата е конечно потврдена без никакви сомнежи. Судот ја потврди валидноста на Директивата и нејзините суштински одредби, а со тоа и ја осигура борбата за праведни плати во Европа која ќе продолжи на цврста правна основа.

Судот ги потврди сите мерки поврзани со промовирањето на колективното договарање, вклучувајќи ја и обврската земјите-членки да изготват акциски планови за зголемување на покриеноста со колективни договори.

Иако Судот го поништи член 5(2) – кој содржеше детални критериуми за проценка на соодветноста на законски утврдените минимални плати – тој ги потврди останатите одредби од Директивата, вклучувајќи го член 5(1), кој ја поврзува минималната плата со соодветноста со цел обезбедување достоинствен животен стандард, и член 5(4), кој го вклучува „прагот на достоинство“ базиран на 50% од просечната и 60% од медијалната плата како клучни референтни точки за проценка на соодветноста. Овие показатели остануваат обврзувачки алатки за водење на праведно утврдување на минималните плати и за обезбедување дека минималната плата ги заштитува работниците од сиромаштија и покрај тоа што се во работен однос.

Генералната секретарка на ЕТУК, Естер Линч, изјави:

„Оваа пресуда потврдува дека Директивата за минимална плата останува цврста – ЕУ може и мора да делува за праведни плати. Јадрото на директивата е зачувано, вклучувајќи ги и праговите на достоинство од 50% и 60%. Но, со тоа што Судот го поништи членот кој објаснуваше како да се мери соодветноста, уште појасно стана дека ни се потребни посилни и применливи правила за праведните плати да станат реалност.“

ЕТУК ги повикува земјите-членки да престанат со пристапот „да почекаме и да видиме“ и да почнат целосна имплементација на Директивата, вклучувајќи го и зголемувањето на платните прагови за да ги достигнат показателите за соодветност и да започнат со усвојување на националните акциски планови за зголемување на покриеноста со колективно договарање до 80%. Владите сега имаат целосна правна сигурност – Директивата е стабилна и мора да се спроведе.

Важно е да се напомене дека повеќето земји-членки на ЕУ со законски минимални плати и понатаму се обврзани со Конвенцијата бр. 131 на Меѓународната организација на трудот (МОТ), која ги утврдува истите критериуми што Судот ги поништи – вклучувајќи ги трошоците за живот, продуктивноста и економските фактори релевантни за достоинствени плати. Овие меѓународни обврски остануваат во сила и мора да ја водат националната примена.

ЕТУК ја повикува Европската комисија веднаш да предложи Препорака за поддршка на спроведувањето на Директивата преку дополнителни упатства и координациски алатки за обезбедување соодветни законски минимални плати кои гарантираат достоинствен животен стандард и за поттикнување растечка конвергенција на платите во Европа.

„Директивата е стабилна, но и нејзината имплементација мора да биде стабилна. Работниците имаат потреба од реално зголемување на платите и вистинска преговарачка моќ, а не од правни дупки. Европа мора да се погрижи секој работник да заработува плата што го достигнува прагот на достоинство и ефикасно да го промовира колективното договарање и неговата покриеност,“ додаде Линч.

ЕТУК потсетува и дека сите земји на ЕУ се обврзани со Европската социјална повелба, која бара ефикасни механизми за обезбедување праведни и соодветни плати и промовирање на колективното договарање.

ЕТУК изразува и загриженост поради укинувањето на одредбата што спречуваше автоматската индексација да се користи како причина за намалување на законските минимални плати, но потсетува дека членот 16 ги спречува земјите-членки да ги намалуваат или укинуваат минималните плати.

Одлуката на Судот следуваше откако еден Генерален Правобранител при Судот на правдата поднесе Мислење дека треба да се преиспита Директивата за адекватни минимални плати