Француските училишта брзаат да ја спроведат забраната на Макрон за мобилни телефони

Синдикатите предупредуваат дека за спроведување на мерката е потребно време, додека францускиот претседател инсистира и на забрана на социјалните мрежи за помладите од 15 години.

Француските средни училишта забрзано работат на воведување забрана за мобилни телефони, откако претседателот Емануел Макрон донесе одлука учениците да имаат ограничен пристап до своите уреди за време на престојот во училиштата.

Синдикатите во образованието, сепак, предупредуваат дека забраната за користење мобилни телефони во училниците, кои ги посетуваат ученици на возраст од 15 до 18 години, тешко може да се спроведе толку брзо.

Според „Гардијан“, Макрон овој месец ја одобрил забраната за мобилни телефони во средните училишта, откако друга мерка – предложената забрана за користење социјални мрежи за лица помлади од 15 години – беше прогласена за неуставна.

Текстот на законот за забрана на социјалните мрежи сега се менува, со надеж дека ќе биде усвоен пред Макрон да ја напушти функцијата во мај.

Франција веќе го забрани користењето мобилни телефони за учениците во основните училишта, како и во пониските средни училишта, односно колежите, кои ги посетуваат деца на возраст од 11 до 15 години.

Сега владата е насочена кон тоа од септември забраната да ги опфати и постарите тинејџери, со образложение дека прекумерното време пред екраните може негативно да влијае врз развојот на децата.

„Невозможно е ова да се воведе од нула од 1 септември“

Според „Гардијан“, училиштата за да ја спроведат забраната мораат да ги изменат своите интерни правила, што е процес кој бара време.

Многу училишта веќе предупредиле дека ќе имаат тешкотии брзо да ја применат новата мерка.

„Невозможно е ова да се воведе од нула од 1 септември“, изјавил Жером Фурние, национален секретар на синдикатот SE-Unsa.

Тој објаснува дека училиштата ќе мора да ги изменат интерните правилници, што подразбира консултации и гласање, како и разговори со самите средношколци.

Еден од клучните проблеми е тоа што учениците често се принудени да користат мобилни телефони и училишни апликации за да добијат основни информации поврзани со наставата.

Тие преку апликации може да го проверуваат распоредот на часови, промените на училници и домашните задачи.

„Некои дури мораат да користат апликации на телефоните како пропусница за влез во мензата за ручек или за позајмување книги од училишната библиотека“, рекол Фурние.

Дополнителен проблем е што средните училишта често имаат ученици во програми за високо образование или стручно оспособување, меѓу кои има и лица на околу 20 години, на кои телефоните им се потребни за работа.

Училиштата ќе треба да одлучат каде точно ќе важи забраната

Според синдикатот, секое училиште ќе треба да одлучи каде и како ќе се применува забраната.

Прашањето е дали мобилните телефони ќе бидат забранети во целиот училиштен простор, вклучувајќи ги ходниците, или ќе постојат исклучоци, на пример во училишниот двор.

Фурние предупредува дека тинејџерите би можеле да го напуштаат училишниот простор за да ги користат телефоните на улицата пред училиштето.

Тоа, според него, може да создаде дополнителни безбедносни ризици, вклучително и во сообраќајот.

Тој смета дека учениците треба да бидат консултирани при воведувањето на мерката, наместо кон нив да се однесува како кон мали деца.

„Овие постари тинејџери се на прагот на зрелоста – некои од нив, кои се во завршна година, ќе гласаат на претстојните претседателски избори“, рекол Фурние.

Макрон не се откажува од забраната на социјалните мрежи

Од кабинетот на Макрон соопштиле дека претседателот не планира да се откаже ниту од напорите за забрана на пристапот до социјалните мрежи за лица помлади од 15 години.

Мерката би опфатила платформи како TikTok и Snapchat, додека владата работи на измена на законскиот текст.

Францускиот Уставен совет неодамна ја поништи првата верзија на законот поради загриженост дека дефиницијата за социјални мрежи не била доволно прецизна.

Тоа значеше дека со забраната би можеле да бидат опфатени и бројни интернет-страници кои вообичаено не се сметаат за социјални мрежи, но овозможуваат коментирање или комуникација.

Според Уставниот совет, таквото ограничување би можело да претставува „несразмерно ограничување“ на слободата на изразување.

Советот изразил загриженост и поради последиците врз приватноста што би можело да ги има воведувањето систем за проверка на возраста на сите корисници.

Правните експерти предупредуваат на нови проблеми

Валер Ндиор, професор по право на Универзитетот Западна Бретања, вели дека правните експерти не биле изненадени од одлуката законот во сегашната форма да биде отфрлен.

Според него, неговото преработување ќе биде сериозен предизвик.

„Засега, како правник, не гледам како е можно да се воспостави рамнотежа меѓу европското право и француското уставно право“, изјавил Ндиор.

Франција така се соочува со сложена задача – да го ограничи времето што младите го поминуваат пред екраните и на социјалните мрежи, но истовремено да обезбеди дека новите мерки нема да ги нарушат нивните права и слободи.

Извор: Vijesti.me