ЕкономијаСвет

Компанија за вештачка интелигенција испиша историја на Волстрит, инвеститорите вложија неверојатна сума

Американската компанија „Антропик“, која стои зад четботот „Клод“, постави нов светски рекорд со најголемата почетна јавна понуда на акции во историјата. Компанијата привлече 81,3 милијарди долари од инвеститорите, надминувајќи го досегашниот рекорд на „Спејс икс“, пренесува Ројтерс.

Акциите беа продадени по цена од 83 долари, што е над првично предвидениот ценовен опсег од 70 до 78 долари. Со оваа трансакција, пазарната вредност на компанијата достигна приближно 1.500 милијарди долари, со што „Антропик“ влезе меѓу највредните компании во светот.

Поради огромниот интерес од инвеститорите, бројот на понудени акции беше зголемен за околу 19 проценти, на 980 милиони. Покрај јавната понуда, компанијата обезбедува дополнителни 26 милијарди долари преку приватна продажба на акции, со што вкупната вредност на двете трансакции достигнува 107,3 милијарди долари.

Тргувањето со акциите на „Антропик“ треба да започне денеска на американската берза „Насдак“, под ознаката „АНТ“. Инвеститорите внимателно ќе го следат почетокот на тргувањето, бидејќи резултатите би можеле да покажат колку е одржлив огромниот интерес за компаниите што развиваат вештачка интелигенција.

Рекордната понуда доаѓа во период на зголемена неизвесност на технолошките пазари, каде што инвеститорите сè почесто ги преиспитуваат високите вреднувања и огромните трошоци за изградба на центри за податоци. И покрај ваквите ризици, интересот за „Антропик“ покажува дека големите инвеститори и понатаму се подготвени да вложуваат значителни средства во развојот на вештачката интелигенција.