Објавена листата на најбогатите земји во светот: Една европска држава убедливо е на врвот

Луксембург повторно е најбогатата земја во светот според бруто домашниот производ (БДП) по жител, покажуваат најновите податоци на Меѓународниот монетарен фонд (ММФ) за 2025 година. Со 140.941 долар по жител, Луксембург убедливо го држи првото место, пред Ирска со 108.919 долари и Швајцарија со 104.896 долари. Во првите пет се и Сингапур со 92.932 долари и Исланд со 90.284 долари.

Топ 10 ја комплетираат Норвешка (89.694 долари), Соединетите Американски Држави (89.105 долари), Макао (76.314 долари), Данска (74.969 долари) и Катар (71.653 долари по жител). Од десетте најбогати економии, САД се единствената држава со повеќе од 100 милиони жители.

Високите позиции најчесто ги заземаат мали држави со силно развиени финансиски, технолошки, индустриски или енергетски сектори. Поради помалиот број жители, нивниот економски учинок по жител е значително повисок.

Сепак, економистите предупредуваат дека БДП по жител не ја покажува реалната распределба на богатството, ниту ги зема предвид разликите во цените, животниот стандард, квалитетот на здравството и образованието или нееднаквоста меѓу населението. Затоа, високото место на листата не значи дека сите граѓани имаат подеднакво високи приходи.

Дополнително, оваа ранг-листа не е пресметана според паритетот на куповната моќ (PPP), па при таква методологија редоследот на земјите може значително да се промени.