Пензионер може да добие 315.000 евра за буре виски купено за само 150 евра

Пензионерот Ангес Кер од Англија би можел да заработи дури 270.000 фунти, односно околу 315.000 евра, од буре шкотско виски кое го купил во 1971 година за само 130 фунти, или околу 150 евра.

Кер случајно го сочувал бурето со виски од дестилеријата „Гленротс“, кое првично го купил како инвестиција. Неговата идеја била да го продаде по пет години и со заработката да продолжи да инвестира во нови буриња, пренесува Би-Би-Си.

„Идејата беше секоја година да се купува ново буре во период од пет години. Во шестата година би го продале првото, би купиле друго и би го задржале профитот“, раскажал Кер.

Бурето исчезнало по банкротот на добавувачот

Но, планот на Кер не се одвивал според очекувањата. Набргу откако го купил бурето, добавувачот банкротирал, а сите траги за неговата инвестиција исчезнале.

Кер бил убеден дека го загубил својот имот.

„Немав полномошно, немав никаков доказ за сопствеништво, ниту знаев каде е бурето. Помислив: тоа е тоа, повторно изгубив сè. Пијам вино, не виски, и не знаев што да правам со него, па го оставив“, раскажал 81-годишниот Кер.

Неколку години подоцна, сепак, дознал дека бурето сè уште постои. Го контактирала компанија со седиште во Глазгов, која побарала од него да плати за неговото складирање.

Вредноста пораснала 2.000 пати

Дури неодамна Кер контактирал со брокер со намера да го продаде бурето. Тогаш добил информација која целосно го изненадила – неговото буре, во кое се наоѓа 55 години старо шкотско виски, е проценето на 270.000 фунти, односно околу 315.000 евра.

Тоа значи дека вредноста на инвестицијата пораснала околу 2.000 пати во однос на сумата што ја платил во 1971 година.

Се верува дека станува збор за најстарото буре виски „Гленротс“ кое досега било понудено на јавна продажба.

Најстарото „Гленротс“ сингл-малт виски што досега било продадено имало 51 година. Минатата година едно шише од него било продадено за 37.000 фунти.

Извор: B92.net