Прашање што ја подели деловната заедница: Дали леденото кафе е непрофесионално на интервју за работа?

Дали би отишле на интервју за работа со чаша ледено кафе во рака? Ако одговорот е „секако, каква врска има тоа со работата?“, можеби токму во тоа е суштината на една од понеобичните дебати за деловниот бонтон што се проширија на социјалните мрежи.

Сè започнало со видео на корпоративен регрутер кој ги предупредил кандидатите дека леденото кафе за време на интервју може да остави впечаток на премногу опуштен пристап.

Набргу темата се преселила на LinkedIn, каде што обичната чаша кафе станала многу повеќе од напиток – почнала да се толкува како прашање на професионалност, статус, самодоверба, па дури и доминација.

Еден совет отишол дотаму што тврдел дека за време на интервју за работа не треба да прифатите никаков напиток.

Одеднаш, и една мала шолја еспресо добила сериозен притисок да го оправда своето постоење.

Но, зошто воопшто ни е важно дали кафето е ладно?

Затоа што деловниот свет е полн со мали сигнали кои сами по себе речиси ништо не значат, но во одреден контекст можат да почнат да се толкуваат како доказ за нечиј карактер.

Облека, начинот на зборување, држењето на телото, доцнењето, телефонот на масата, начинот на ракување, местото на кое ќе седнете – а сега и видот на кафето.

Во една ситуација леденото кафе е сосема нормален избор. Во друга, одеднаш може да изгледа несоодветно.

Во кафуле? Секако.

На неформален деловен состанок? Веројатно.

Во канцеларијата на директорот, на маса од скапо дрво? Тука веќе некој може да почне да размислува за подметач.

Токму во тоа е проблемот со непишаните правила на професионалното однесување – тие не се исти насекаде, а често никој никогаш не ви ги објаснува.

Бидете свои, но не премногу

Едно од најчудните барања на современиот деловен свет е да ја покажете својата личност, но внимателно да одмерите колку од неа ќе внесете во просторијата.

Бидете автентични, но професионални. Бидете различни, но не премногу. Оставете впечаток, но не поради погрешната работа. Покажете самодоверба, но немојте да делувате надмено.

Со други зборови – бидете свои, но онаа верзија од себе која веќе ги знае правилата на просторијата во која штотуку влегла.

Еден пример од американската деловна култура добро покажува колку овие правила можат да бидат апсурдни.

На еден кандидат татко му советувал да се откаже од чорапите со разни мотиви кога оди на интервјуа за работа. Не биле вулгарни ниту нападни. Напротив, биле прилично дискретни, со мотиви како јастози или ирваси.

Но пораката била јасна: прво добиј ја работата, а потоа покажувај ја својата личност.

„Не сакаш да им дадеш причина да кажат не, особено поради некоја глупава причина“, гласел советот.

И токму тука леденото кафе престанува да биде приказна за кафе.

Ако ги знаете правилата, лесно е да ги почитувате. Но ако не ги знаете, можете случајно да прекршите нешто за кое никогаш не сте ни знаеле дека постои.

Ова особено важи за луѓето кои не пораснале во корпоративна средина и немаат некого кој ќе им објасни што во одредено деловно опкружување се смета за „нормално“.

Она што за еден човек е само по себе разбирливо, за друг може да биде целосно ново правило што мора да го научи во од.

Професионалноста се менува

Пандемијата дополнително ги искомплицира овие правила.

Одеднаш сите добивме можност да ѕирнеме во домовите на колегите и соговорниците. Полицата со книги зад соговорникот на Zoom стана дел од професионалниот идентитет. Растението стана декорација. Сликата на ѕидот – порака.

Дури постоеја и платформи кои ги оценуваа позадините на вработените според осветлувањето, длабочината на кадарот и бројот на кабли што се гледаат.

Во еден момент сите станавме сценографи на сопствениот професионален живот.

А потоа правилата повторно се променија.

Куче кое ќе помине низ кадарот повеќе не мора да биде катастрофа. Дете кое ќе се појави на состанокот може едноставно да биде – дете. Кујната во позадина повеќе не е автоматски доказ за непрофесионалност.

Правилата не исчезнаа. Само станаа уште позависни од една стара деловна вештина: да ја читате ситуацијата.

И тоа веројатно е многу покорисно правило од она дека леденото кафе е непрофесионално.

Не е проблемот во кафето, туку во ситуацијата

Постојат деловни ритуали без кои светот сигурно може да продолжи да функционира.

Не мора да ги криеме чорапите со мотиви. Не мора да пиеме жешко кафе за да изгледаме сериозно. Не мора да се преправаме дека сме воодушевени од секоја средба.

Но професионалноста сепак би требало да подразбира нешто многу поедноставно – основна свест за тоа како нашето однесување влијае врз луѓето околу нас.

Не ја ставајте чашата што се поти директно врз туѓи документи. Не поминувајте половина состанок на телефонот затоа што вашиот повик е поважен од сè што се случува околу вас.

И, можеби најважно, не доцнете на интервју за работа затоа што сте застанале да купите ледено кафе.

Зашто тогаш проблемот навистина не е кафето.

Ако влезете 15 минути подоцна со голема чаша свежо ледено кафе во раката и објаснување дека за сè е виновен сообраќајот, тешко дека ќе ве спаси фактот што сте го избрале „вистинскиот“ напиток.

Професионалноста, сепак, многу помалку се наоѓа во чашата, а многу повеќе во начинот на кој се однесуваме кон луѓето околу нас.

Затоа, слободно понесете ледено кафе.

Само немојте поради него да задоцните.

Извор: BIZLife