Работник загина при внесување мебел во зграда во изградба, обвинение против инвеститорот и фирмата
Основното јавно обвинителство Охрид поднесе обвинителен предлог против две физички и две правни лица поради несреќа во која животот го загуби работникот Кристијан Љушев, кој паднал во лифтовско окно од четврти кат во зграда во изградба.
На првообвинетиот, одговорно лице во една од фирмите, му се става на товар дека како инвеститор не презел соодветни мерки за заштита при изградбата на објектот, со што ја загрозил безбедноста на луѓето. Лифтовското окно не било обезбедено со заштитна ограда, градилиштето не било одржувано во уредна состојба, влезот во зградата не бил обезбеден од неовластен пристап, а на скалите немало поставено огради за спречување падови.
Според обвинението, на 12 јануари, во утринските часови, четворица работници ангажирани од второто обвинето правно лице влегле во зградата за да внесат мебел. Кога пристигнале на четвртиот кат, еден од нив се сопнал од кофа оставена во ходникот, изгубил рамнотежа и паднал низ отворот за лифтот, односно во лифтовското окно кое водело до подрумските простории. Од здобиените тешки телесни повреди починал на самото место.
Со обвинението се опфатени и фирмата што ги ангажирала работниците и нејзиниот управител, поради непочитување на прописите за работни односи и заштита при работа.
Починатиот Кристијан Љушев бил ангажиран без договор за вработување, односно работел непријавено. Обвинителството наведува дека му било дозволено да работи како помошник монтер без претходна обука за безбедност и здравје при работа, без здравствен преглед и без соодветни упатства за работа во услови на зголемен ризик.
Работниците извршувале работни задачи врз основа на усмен налог од управителот, без претходен увид и проценка на работната средина, иако станувало збор за зграда во изградба во која постоела зголемена опасност по нивната безбедност. Според обвинителството, со непочитувањето на законските прописи обвинетите го изложиле работникот на опасност по животот.
На обвинетите им се ставаат на товар кривичните дела „Тешки дела против општата сигурност“, „Предизвикување општа опасност“, „Повреда на правата од работен однос“ и „Непреземање мерки за заштита при работа“.
Обвинителството, со цел да спречи евентуални статусни промени и отуѓување на имотот за време на постапката, до Основниот суд во Охрид доставило и предлог за забрана на статусни промени во двете обвинети фирми.

