Сè започнало поради патики што не можел да ги најде: како тинејџер од 16 години создаде успешен бизнис

Приказната на Хосе Угует од Аргентина покажува како љубовта кон спортот, заедно со Instagram и многу упорност, може од една тинејџерска идеја да создаде успешен бизнис со спортска опрема.

Приказната за Хосе Угует започнува тивко, без капитал и без каков било бизнис-план. Денес, на 24 години, тој води успешен бизнис, но патот до успехот бил исполнет со предизвици кои немаат многу врска со бројки и профит. Сè започнало кога имал само 16 години, во период кога поминувал низ еден од најтешките моменти во својот живот.

Излез од темнината преку спортот

Депресијата се појавила незабележливо, како збир од неискажани емоции и тинејџерски проблеми. Хосе се сеќава на месеци во кои спиел само два или три часа, речиси не разговарал со никого и сè држел длабоко во себе.

„Кошарката беше тоа што ме извлече од таа ситуација“, се присетува тој во разговор за медиумите, пренесува Bizportal.

Во својот роден град Росарио, Аргентина, единственото прибежиште го нашол на кошаркарскиот терен. Идејата за бизнис се појавила речиси случајно. Хосе сакал да купи специфични патики кои никаде не можел да ги најде. Наскоро сфатил дека и другите играчи од неговиот клуб се соочуваат со истиот проблем.

Тогаш си поставил едноставно прашање: „Ако никој не ги носи, зошто да не ги донесеме ние?“ Тоа бил моментот што променил сè.

Првите 30 долари и учење во движење

Неговиот прв „бизнис модел“ бил импровизиран договор со продавач кој веќе имал залиха, но не знаел како да ја продаде. Хосе почнал да објавува каталог на патики на Instagram страницата Hoop Shoes.

Без никаква почетна инвестиција, го продал својот прв пар патики и заработил околу 30 долари. За тинејџер кој во тој период минувал низ длабока лична криза, тоа бил првиот знак на надеж.

Хосе немал формално бизнис образование, ниту знаел да користи Microsoft Excel. Сè што научил за продажба го совладал преку туторијали на YouTube и од книги, а наученото го применувал речиси истиот ден.

„Беше заразно. Ќе научев нешто, ќе видев резултат и веднаш ќе посакав да научам уште повеќе“, објаснува тој.

Неговата соба, а подоцна и речиси целата семејна куќа, се претвориле во магацин за патики.

Заедницата поважна од продажбата

Вистинскиот пресврт се случил за време на COVID-19 кризата. Додека кошаркарските терени биле празни, Хосе одлучил да се фокусира на содржина наместо на директна продажба.

Организирал преноси во живо, покренувал предизвици и разговарал со следбениците на социјалните мрежи како со соиграчи од тим. Кога спортот повторно се вратил, тие луѓе станале негови најверни купувачи, бидејќи веќе постоела силна емоционална врска.

Тимска работа и развој на бизнисот

Денес во проектот учествуваат повеќе од десет луѓе. Брендот обединува тим соработници кои учествуваат во развојот и продажбата. Хосе дури го вработил и својот татко како своја десна рака, а брендот соработувал и со кошаркарски ѕвезди како Facundo Campazzo.

Во план е и изградба на кошаркарски терени во рамките на продажниот простор.

Најважната животна лекција

И покрај големиот успех и бројните патувања, Хосе вели дека најголемата промена во неговиот живот била лична, а не финансиска. Од тешкиот период извлекол важна поука која денес му служи како животен компас – разбирањето дека сè е минливо.

Својот бизнис не го мери само со профит, туку и со мисијата да придонесе за развој на кошаркарската култура во својата земја.

Кога денес се навраќа наназад, вели дека клучниот момент не била првата продажба, туку одлуката на едно шеснаесетгодишно момче да си даде уште една шанса.

„Јас сум кошаркар кој им продава на други кошаркари“, вели тој.

Неговата приказна потсетува дека најуспешните проекти често настануваат од љубов, потреба и желба да се најде излез од најтешките животни моменти.

Брендот започнал на Instagram кога Хосе имал 16 години и објавувал каталог со патики. Денес профилот има повеќе од 160.000 следбеници и претставува главен канал за продажба и комуникација со кошаркарската заедница.

Извор: Bizportal.rs