Тревога во Германија поради историската одлука на Volkswagen: Моќниот синдикат се заканува со жесток отпор
Германската влада се обидува да го спречи Volkswagen да затвори дел од своите фабрики во земјата, додека најголемиот индустриски синдикат IG Metall најавува дека ќе ги искористи сите расположливи средства за да ги заштити работните места.
Според германските медиуми, Volkswagen разгледува можност за затворање на четири фабрики во Германија и намалување на бројот на вработени за дури 100.000 на глобално ниво. Компанијата, наводно, на овој начин се обидува да одговори на сè посилната конкуренција од Кина, американските царини и слабеењето на побарувачката на европскиот автомобилски пазар.
Доколку биде реализирано, ова би било едно од најголемите реструктурирања во историјата на Volkswagen и дополнителен удар за германската економија, која веќе се соочува со сериозни предизвици.
Германската влада: Одлуката е на компанијата
Портпаролот на германската влада изјави дека Берлин сака да создаде услови фабриките да останат профитабилни, но нагласи дека сите одлуки за реструктурирање се исклучиво во надлежност на Volkswagen.
„Нашата цел е да обезбедиме поволни услови за производство, но деловните одлуки мора да се носат врз комерцијална основа“, порача портпаролот.
Плановите, кои компанијата сè уште официјално не ги потврдила, се очекува да бидат разгледувани на седницата на Надзорниот одбор закажана за 9 јули, на која ќе присуствуваат и претставници на вработените.
Спорна фабриката во Оснабрик
Една од најконтроверзните точки во планот се однесува на фабриката на Volkswagen во Оснабрик.
Според медиумските информации, компанијата планира во 2027 година да го прекине производството во овој погон и да му го отстапи на израелската одбранбена компанија Rafael, која би произведувала компоненти за противракетниот систем „Железна купола“.
Наводно, на ова се спротивставил Qatar Investment Authority (QIA), третиот најголем акционер во Volkswagen со 17 проценти од гласачките права, поради политичките тензии меѓу Катар и Израел.
Иако германската сојузна влада и покраината Долна Саксонија ја поддржуваат предложената пренамена, дел од локалното население исто така се противи на проектот.
Синдикатот најавува жестока борба
Раководството на Volkswagen веќе ги информирало претставниците на работниците дека претходно договорените намалувања на бројот на вработени нема да бидат доволни за исполнување на финансиските цели на компанијата.
Информациите за можноста да бидат укинати околу 100.000 работни места од вкупно 657.000 вработени ширум светот предизвикаа остри реакции од синдикатот IG Metall и Работничкиот совет на Volkswagen.
Во заедничко соопштение тие ги оценија плановите како „неодговорни закани“.
IG Metall е најголемиот индустриски синдикат во Германија и еден од најмоќните во Европа. Тој ги застапува работниците од металната и електроиндустријата, автомобилскиот сектор, челичната, текстилната и дрвната индустрија, како и дел од ИТ-секторот, со повеќе од 2,2 милиони членови.
„Ќе ги искористиме сите средства што ни стојат на располагање за да ги запреме овие напади врз правата на работниците, Законот за Volkswagen, принципите на заедничко одлучување и нашите производствени капацитети“, порачаа од синдикатот.
Претставниците на вработените ја повикаа управата наместо, како што велат, „слеп активизам“, да се фокусира на развој на поконкурентни производи, нови технологии и зачувување на работните места.
Извор: Index.hr
