Затворскиот персонал низ Белгија започна национален штрајк

Затворскиот персонал ширум Белгија во понеделник започна национален штрајк во знак на протест поради пренатрупаноста на затворите, лошите услови за работа и зголеменото насилство во казнено-поправните установи.

Како што пренесува белгиската новинска агенција Belga, штрајкот е организиран како израз на солидарност со вработените во неколку затвори во франкофонскиот дел на земјата, каде што, според синдикатите, разговорите со локалното раководство целосно пропаднале.

Синдикалните организации наведуваат дека во повеќе наврати предупредувале на сериозните проблеми во затворскиот систем, меѓу кои пренатрупаноста, фактот што стотици затвореници спијат на душеци поставени на под, сè почестите напади врз затворскиот персонал и влошените услови за работа.

Тие ги обвинуваат затворските власти дека не презеле никакви конкретни мерки, и покрај повеќемесечните предупредувања.

Во белгиските затвори во моментов се наоѓаат околу 13.700 затвореници, иако официјалниот капацитет е нешто повеќе од 11.000 места. Според податоците, повеќе од 750 затвореници се принудени да спијат на душеци на подот.

Директорите на затворите исто така предупредуваат дека во текот на изминатата година значително се зголемил бројот на сериозни инциденти и повреди на вработените поврзани со насилство.

Известувањето за штрајк било поднесено на 19 јуни, но дополнителните разговори што се одржале минатата седмица не довеле до решение на спорот.

Од белгиската затворска служба соопштија дека штрајкот е масовно поддржан, а за време на протестот е ангажирана дополнителна полициска поддршка со цел да се одржи безбедноста во затворите.

Извор: N1