Усвоена Конвенцијата на МОТ за достоинствена работа во платформската економија

На 114. Меѓународна конференција на трудот, годишното собрание на Меѓународната организација на трудот (МОТ), беше усвоена Конвенцијата за достоинствена работа во платформската економија, објави порталот на Обединетите грански синдикати „Независност“.

Глобалниот документ, познат и како Конвенција МОТ 193, ги поставува првите правно обврзувачки меѓународни стандарди за заштита на работниците во таканаречената „гиг“ економија, меѓу кои се доставувачите, возачите и работниците кои работат преку дигитални платформи.

Конвенцијата потврдува дека и во платформската економија мора да се почитуваат основните работнички права, вклучувајќи ја слободата на здружување и правото на колективно преговарање.

Една од клучните одредби предвидува заштита од погрешна класификација на работниците, со цел да се спречи компаниите неоправдано да ги третираат како самовработени лица и на тој начин да избегнуваат плаќање законски обврски.

Новите правила ги обврзуваат платформите да бидат транспарентни во користењето на автоматизирани системи и алгоритми кои влијаат врз распределбата на работните задачи и заработката. Компаниите ќе мора да обезбедат можност за човечка интервенција при носење клучни одлуки, како што е блокирањето или деактивирањето на корисничките сметки на работниците.

Конвенцијата 193 предвидува и навремена исплата на надоместоците, кои не смеат да бидат пониски од минималната плата, како и пристап до социјална заштита. Дополнително, документот содржи мерки за заштита на личните податоци на работниците.

Од владите се бара да преземат посебни мерки за да обезбедат работниците на платформите да можат да се повлечат од работа доколку постои ризик по нивното здравје и безбедност, без страв од санкции или одмазда. Исто така, државите треба да обезбедат заштита од насилство и вознемирување на работното место.

Новите правила ќе важат за сите работници, без оглед на нивниот формален договорен статус. Иако самата Конвенција нема директен механизам за казнување, таа ги обврзува 187-те земји членки да ја достават на ратификација пред надлежните национални органи и да ја вградат во своето законодавство.

Меѓународната конфедерација на синдикати оцени дека новата конвенција претставува значаен исчекор во обезбедувањето права, заштита и достоинство за милионите работници кои заработуваат преку дигитални платформи.

Извор: Danas.rs