Ова е земја број 1 за пензионирање во странство
Годинава, Global Citizen Solutions го објави својот Global Retirement Report 2025, кој ги рангира најдобрите земји за пензионирање во странство. Извештајот анализираше 44 програми за пасивен приход и пензионерски визи, земајќи ги предвид 20 целни индикатори групирани во шест подиндекси: процедура, државјанство и мобилност, економија, даночна оптимизација, квалитет на живот и безбедност и интеграција. Секоја земја доби оценка од максимум 100 поени.
САД не се најдоа на листата, од едноставна причина – земјата нема официјална пензионерска виза. Според истражувањето, најголем број земји од топ 10 се наоѓаат во Америка и Европа.
„Америките доминираат кога станува збор за достапност на пензионерски визи за дигитални номади, а потоа следува Европа. Овие региони имаат исклучително висок квалитет на живот, над просекот,“ изјави д-р Лаура Мадрид Сарторетo, раководител на истражување во Global Intelligence Unit на GCS, за CNBC Make It.
Таа додава дека тоа не е случајност, бидејќи една од главните мотивации на луѓето кои се селат во странство е токму потрагата по подобар квалитет на живот.
Португалија на врвот на листата
Најдобро рангирана земја е Португалија, со вкупен резултат од 92,61 поен.
„Пензионерската визна програма на Португалија последните 10 години е водечки пример. Земјата вложува во привлекување инвеститори, пензионери и дигитални номади и денес има одлични оценки кога станува збор за квалитетот на живот,“ објаснува д-р Сарторетo. „Според Светскиот индекс на мир, Португалија е најбезбедна земја во Европа и една од најпосакуваните дестинации за пензионирање.“
Португалија нуди т.н. D7 виза за граѓани надвор од ЕУ. Таа им овозможува на лица со стабилен пасивен приход – како пензија или приход од наемнини – да се пензионираат во земјата.
За аплицирање потребен е минимален приход од 870 евра месечно. По добивањето на првата дозвола за престој и по најмалку пет години живеење во земјата, постои можност за барање постојан престој или државјанство.
Даночни поволности и „златни визи“
Португалската влада применува систем на оданочување на светскиот приход, што значи дека го вклучува и приходот остварен во странство. Земјата нема данок на имот ниту на наследство за најтесното семејство, а за останатите важи такса на наследство од 10%.
Португалија е позната и по својот програм за „златни визи“, кој овозможува државјанство или престој преку инвестиции, иако вложувањето во недвижнини е исклучено од програмата.
Владата бележи пораст од 72% во одобрувањето на вакви визи, а најголем дел од апликантите се Американци. Според Forbes, од 2012 година досега, преку програмата се привлечени повеќе од 7,2 милијарди долари инвестиции.
