Форд воведува задолжителни четири работни дена од канцеларија

Компанијата Ford Motor објави нова политика на работа според која најголемиот дел од административните вработени со фиксна плата ќе мора да бидат физички присутни во канцеларија четири дена неделно, почнувајќи од 1 септември.

Како што пренесува Ројтерс, оваа одлука е дел од стратегијата за зголемување на ефикасноста и забрзување на трансформацијата на Форд во поагилна, попрофитабилна и помалку циклусна компанија.

Во соопштението од компанијата се наведува дека веќе значителен дел од вработените присуствуваат во канцеларија три или повеќе дена неделно, а дека физичката присутност се очекува да ја поттикне соработката и растот.

Новите правила ќе важат глобално за најголемиот дел од вработените со фиксна плата, иако Форд не откри колку луѓе точно ќе бидат опфатени. Сите вработени се информирани за новиот режим во средата.

Од пандемијата во 2020 година, голем број компании се обидуваат да пронајдат најдобар модел на работа. Некои, како Amazon и JPMorgan, веќе воведоа обврска за секојдневна работа од канцеларија за своите хибридни тимови.

Ривалската компанија General Motors се обиде со слична мерка во 2022 година, воведувајќи обврзно тридневно доаѓање во канцеларија, но се соочи со негодување од вработените, по што примената беше одложена.

И Форд и GM моментално се натпреваруваат за технолошки кадар од Западниот брег на САД, во обид да го засилат развојот на електрични возила и да останат конкурентни со компании како Tesla. Тоа доведе и до построги критериуми за перформанси, бонуси и присуство на работа.

Во таа насока, Форд годинава ги намали акциските бонуси за дел од средниот менаџмент, нагласувајќи дека целта е подобрување на перформансите. GM, пак, минатата година воведе построг систем за оценување на вработените, со зголемен притисок врз оние со послаби резултати – да се подобрат или да ја напуштат компанијата.

Извор: M.A./EUpravo zato/biznis.rs