Се затвора ли последната фабрика со работничко самоуправување во Хрватска?

Иванец – ITAS Prvomajska од Иванец, единствената фабрика за машински алати во Хрватска, но веројатно и последната што функционира на принципот на работничко самоуправување, се соочува со сериозна закана од затворање.

По 65 години постоење, фабриката која преживеа стечај, штрајкови со глад, блокади и голем пожар пред четири години, сега е доведена до раб на опстанок поради долг од 1,4 милиони евра. Според HRT, струјата во фабриката треба да биде исклучена веќе денес, што практично би значело крај на производството.

Блокирана сметка и спор со доверителите

Сметката на компанијата е блокирана уште од февруари. Долгот од 1,4 милиони евра се должи кон H-Abduko, агенција за наплата на долгови која ја презеде хипотеката врз фабричката хала од поранешните сопственици.

Директорот на фабриката, Драгутин Варга, изјави дека машините и инфраструктурата се во сопственост на компанијата, додека доверителот располага само со објектот.

„Сè што е внатре е наше – машините, инфраструктурата. Тие ги имаат само ѕидовите и беше логично да се грижат за нивното одржување, но тоа не го направија“, истакна Варга.

Од друга страна, од H-Abduko наведуваат дека ITAS ја користи имотната без правна основа и без подмирување на обврските, и покрај повеќекратните обиди за договор.

Половина од работниците веќе заминале

Од вкупно 120 вработени, половина веќе дале отказ, додека останатите не примиле плата со месеци. Работниците стравуваат дека исклучувањето на струјата ќе значи дефинитивен крај.

„Ако ни ја исклучат струјата, тоа е крај. Сè уште работиме нешто и се надеваме дека ќе се најде решение, но се плашам дека ќе биде полошо“, изјави работникот Данијел Цопак.

Потрага по спас во последен момент

Раководството на фабриката се надева на можен пресврт преку пронаоѓање стратешки партнер, но преговорите сè уште се во рана фаза.

„Ќе се обидеме да најдеме стратешки партнер. Во тек се разговори, но тоа е сè уште далеку“, додаде директорот Варга.

Доколку наскоро не се најде решение, Хрватска би можела да остане без последната фабрика која функционира на принципот на работничко самоуправување – модел кој некогаш беше симбол на индустриското наследство на регионот.

Извор: b92.net