По 13 години во Мајкрософт даде отказ: „Компанијата ѝ помага на израелската војска“
Долгогодишниот инженер на Мајкрософт, Скот Сатфин-Гловски, поднесе оставка по 13 години работа во компанијата, наведувајќи ја како причина континуираната продажба на cloud услуги на израелската војска и одбивањето на раководството да разговара за војната во Газа, пренесува CNBC.
„Повеќе не можам да бидам дел од овозможувањето на она што можеби се најголемите злосторства на нашето време,“ напиша тој во своето проштално писмо до колегите. Во пораката се повика на напис на Associated Press од февруари, според кој израелската војска имала најмалку 635 претплати на Мајкрософт, од кои голем дел сè уште се активни.
Од Мајкрософт одбија да го коментираат случајот.
Политички контекст и тензии во компанијата
Оставката на Сатфин-Гловски доаѓа еден ден откако поранешниот претседател Доналд Трамп објави дека Израел и Хамас се согласиле на првата фаза од мировниот план, две години по почетокот на последниот конфликт. Според Associated Press, САД испраќаат околу 200 војници во Израел за да го поддржат договорот за прекин на огнот.
Конфликтот со месеци е извор на тензии во рамките на Мајкрософт. Вработени организираа протести против соработката со израелската војска, а петмина од нив добија отказ. Во септември, компанијата објави дека престанала да обезбедува одредени услуги за израелското Министерство за одбрана, но без детали за тоа кои услуги се прекинати.
Одлуката дојде по извештај на The Guardian дека единицата 8200 на израелската армија изградила систем за следење телефонски повици на Палестинци.
Сатфин-Гловски наведе и дека компанијата ги затворила внатрешните комуникациски канали преку кои вработените можеле да изразат загриженост за користењето на производите на Мајкрософт од страна на израелската војска.
NEW | Microsoft Workers Protest “Half-Measure” Move on Israeli Military Contracts
— Quds News Network (@QudsNen) October 9, 2025
Employees at Microsoft’s Redmond campus launched a protest under the banner No Azure for Apartheid, condemning the company’s decision to end only limited services tied to Israel’s Unit 8200… pic.twitter.com/FFb2AMSURi
Протестите продолжуваат
Пред седиштето на Мајкрософт во Редмонд, во четвртокот, вработени и членови на заедницата развија транспаренти барајќи од компанијата да ги прекине врските со Израел, извести групата No Azure for Apartheid.
Групата побара од Мајкрософт да ја слушне петицијата потпишана од над 1500 вработени, кои бараат поддршка за прекин на огнот во Газа.
„Денес прекинот на огнот во Газа конечно стапува на сила по две години геноцид, но злосторствата, кршењето на човековите права, воените злосторства, апартхејдот и окупацијата продолжуваат,“ напиша Сатфин-Гловски во својата порака.
Извор: Index.hr
