Се менуваат приоритетите на вработените ширум светот: Европа ја гледа својата главна предност како шанса за привлекување таленти
Новите истражувања покажуваат дека рамнотежата меѓу работата и приватниот живот станала поважна од платата, а Европа ја гледа токму во тоа својата можност да привлече глобални таленти — особено сега кога САД ги зголемуваат трошоците за визи за стручњаци.
Според годишниот извештај на компанијата за вработување Randstad, за првпат во последните 22 години, балансот меѓу работата и животот е поважен фактор за работниците од висината на платата — и тоа не само во Европа, туку и во Азија-Пацифик и на американскиот континент.
Европа ја гледа својата шанса
Овој тренд, според експертите, претставува голема можност за Европа, која веќе важи за регион што нуди подобар квалитет на живот од конкуренцијата.
„Пред нас е уникатна можност да привлечеме уште повеќе глобални таленти во европскиот екосистем и тоа не смееме да го пропуштиме“, изјави за CNBC Петер Шпехт, партнер во европската инвестициска фирма Creandum.
Тој смета дека краткорочно зголемување на концентрацијата на таленти во Велика Британија и Европа би било „моментална победа“, додека долгорочно, развојот на истражувачки и развојни капацитети би донел трајна корист.
Шпехт потсетува и на важноста од јавни политики кои ќе ја направат Европа поатрактивна за основачи и стартапи. Како клучни мерки ги наведува:
- пристапен визен систем за висококвалификувани стручњаци,
- единствени акции за основачи на ниво на ЕУ,
- слободно движење на работниците во рамки на Унијата,
- поттикнување развој на вештини во области како вештачката интелигенција.
Европа наспроти САД, Дубаи и Азија
Додека во САД дополнително се зголемуваат трошоците за H-1B визите (работни визи наменети за висококвалификувани странци), Велика Британија размислува дури и за укинување на некои такси за најдобрите професионалци, пишува Financial Times. Владата на премиерот Кир Стармер сака да привлече глобални експерти, особено во областа на науката, истражувањето и технологијата.
„Британскиот имиграциски систем се разликува од многу други – транспарентен е и многу брз, што им дава сигурност на работодавците при планирањето на развојот на талентите,“ вели Луиз Хејкок од глобалната фирма за имиграциски услуги Fragomen.
Сепак, експертите предупредуваат дека европските земји, вклучително и Велика Британија, можеби нема да успеат целосно да ја искористат шансата што ја отвори зголемувањето на цената на американските визи.
„Се наоѓаме во глобална војна за таленти. Не се натпреваруваме само со САД. Наши конкуренти се и Дубаи, кој нуди нулта даночна стапка на капитална добивка, и Милано, кој воведува големи даночни олеснувања. Тие продаваат сон,“ изјави Хари Стибингс, основач на инвестицискиот фонд 20VC.
Иако Лондон и Европа се сè попривлечни за десетици американски претприемачи, Стибингс предупредува дека ЕУ мора да испрати појасен сигнал дека е „отворена за бизнис“, бидејќи во глобалната трка за таленти — конкуренцијата не спие.
Извор: EUpravo zato / CNBC
