Anthropic излегува на берза: ИПО-понудата би можела да достигне 100 милијарди долари

Компанијата зад вештачката интелигенција Claude планира една од најголемите иницијални јавни понуди во историјата. Нејзината пазарна вредност би можела да достигне и 1,4 билиони долари, но инвеститорите сè повеќе се сомневаат во профитабилноста на индустријата за вештачка интелигенција.

Anthropic, компанијата која стои зад моделот за вештачка интелигенција Claude, се подготвува за излегување на берза, а нејзината иницијална јавна понуда на акции (ИПО) би можела да достигне околу 100 милијарди долари.

Компанијата во изменетиот проспект доставен до американската Комисија за хартии од вредност објавила дека цената на акциите ќе се движи од 70 до 78 долари.

Конечната цена треба да биде утврдена на 18 ноември, додека тргувањето со акциите под берзанската ознака ANT на Nasdaq се очекува да започне еден ден подоцна, пренесува CNBC.

Anthropic нуди 825 милиони акции. Доколку се продадат по највисоката предвидена цена, компанијата би можела да собере до 64,4 милијарди долари.

На ова треба да се додадат и претходно договорените приватни инвестиции во вредност од 26 милијарди долари, зад кои стојат Google, Nvidia, AMD, Broadcom, Micron, Microsoft и TSMC.

Со дополнителната можност за купување акции од страна на банките, вкупната вредност би можела да достигне околу 100 милијарди долари, пресметува Bloomberg. Со тоа, оваа понуда би го надминала досегашниот рекорд на компанијата SpaceX.

Проценетата вредност достигнува 1,4 билиони долари

Според највисоката цена во понудениот распон, пазарната вредност на Anthropic би изнесувала околу еден билион долари, односно до 1,4 билиони долари доколку се земат предвид и дополнителните опции и акциите на вработените.

Сепак, Reuters наведува дека оваа процена е нешто пониска од очекувањата на дел од инвеститорите, поради неодамнешното намалување на интересот за секторот на вештачката интелигенција.

Уште во текот на летото се споменуваше процена од два билиони долари. Во последниот приватен инвестициски круг, во мај, Anthropic беше проценет на 965 милијарди долари.

Поради тоа, дел од аналитичарите сметаат дека компанијата избрала особено неповолен момент за излегување на берза.

Постојат неколку причини за ваквите процени. Инвеститорите сè почесто ја преиспитуваат економската оправданост на огромните вложувања во вештачката интелигенција. Истовремено, расте политичкиот отпор кон изградбата на големи центри за податоци, додека конкуренцијата ги намалува цените на AI-моделите, што може да влијае врз профитните маржи и долгорочната профитабилност.

„Во овој момент гледаме нешто налик на штрајк на инвеститорите во технолошкиот сектор“, изјави Кит Лернер, раководител на инвестиции во Truist Advisory Services, за Reuters.

Технолошкиот сектор се соочува со сериозен пад

Промената на расположението на инвеститорите веќе се одрази врз берзите.

На 5 ноември индексот S&P 500 забележа пад од 4,36 проценти, најголем од април 2025 година, додека Nasdaq се намали за 5,52 проценти, влегувајќи во територија на корекција.

Акциите на Nvidia за само еден ден изгубија 9,3 проценти од вредноста, со што целосно го избришаа растот од почетокот на годината. AMD и Micron забележаа падови од повеќе од 17 проценти.

Еден од факторите беше политичката неизвесност околу изградбата на центри за податоци и идната регулатива во САД. Инвеститорите стравуваат дека новите ограничувања би можеле да го забават развојот на инфраструктурата неопходна за вештачката интелигенција.

За Anthropic ова е особено важно бидејќи Nvidia истовремено е негов добавувач на чипови и иден акционер.

Со други зборови, производителите на чипови вложуваат милијарди долари во компанија која потоа истите тие средства ги користи за купување нивни производи.

Според проспектот, Anthropic има преземено обврски во вредност од 895 милијарди долари, главно поврзани со компјутерска моќ, чипови и електрична енергија.

Приходите растат, но компанијата бележи загуби

Растот на Anthropic е навистина импресивен. Во третото тримесечје приходите достигнале речиси 17 милијарди долари, во споредба со 1,4 милијарди долари во истиот период претходната година.

Тоа претставува раст од приближно 12 пати.

Сепак, оперативните трошоци достигнале 17,5 милијарди долари. Така, компанијата од оперативна добивка од 974 милиони долари во второто тримесечје преминала во загуба од 567 милиони долари.

Главна причина за тоа се петте милијарди долари трошоци за краткорочно закупена компјутерска инфраструктура.

Дополнителна особеност на компанијата е нејзиниот модел на корпоративно управување. Купувањето акции на Anthropic не значи и стекнување контрола врз компанијата.

Седумтемина коосновачи преку една акција од класата F контролираат 50,1 процент од гласачките права, што значи дека ги задржуваат клучните одлуки во свои раце.

Anthropic ќе биде тест за целата AI-индустрија

Излегувањето на Anthropic на берза би можело да стане важен показател за иднината на целата индустрија за вештачка интелигенција.

OpenAI, според досегашните планови, размислува за излегување на берза во 2027 година. Но, пред тоа, инвеститорите ќе добијат можност да проценат дали се подготвени да платат билионски суми за компанија која расте со огромна брзина, но сè уште се соочува со високи трошоци и неизвесна долгорочна профитабилност.

Дополнителен притисок создава и распоредот на настаните. Nvidia треба да ги објави кварталните финансиски резултати на 17 ноември, само еден ден пред Anthropic да ја утврди конечната цена на своите акции.

Така, исходот од овие настани би можел значително да влијае врз расположението на инвеститорите кон целиот сектор на вештачката интелигенција.

Извор: b92.net