Дизни планира укинување на илјадници работни места и намалување на трошоците

Американската компанија „Волт Дизни“ подготвува нов бран мерки за штедење, кој би можел да доведе до укинување на илјадници работни места. Од одредени менаџери веќе е побарано да изработат планови за намалување на годишните трошоци за 20 проценти, објави „Блумберг“, повикувајќи се на извори запознаени со случувањата.

Според информациите, заштедите би се реализирале преку намалување на бројот на вработени, но и преку кратење на други оперативни трошоци. Изворите, кои побарале да останат анонимни поради доверливата природа на разговорите, наведуваат дека неколку делови од работењето на компанијата би можеле да бидат особено погодени.

Меѓу нив се тематските паркови, телевизиските канали и филмското студио на Дизни.

Новиот извршен директор на компанијата, Џош Д’Амаро, планира дел од средствата заштедени преку овие мерки повторно да ги инвестира во филмската и телевизиската продукција, технологијата, тематските паркови и бизнисот со крстарења.

Ова не е првпат Дизни да спроведува обемно намалување на трошоците. Во изминатите години компанијата веќе заштеди неколку милијарди долари и укина илјадници работни места во различни сектори, меѓу кои ABC, „Пиксар“, ESPN и филмското студио.

На крајот од последната фискална година, Дизни имаше околу 231.000 вработени ширум светот.

Американскиот весник „Волстрит џурнал“ претходно во октомври објави дека компанијата планира и реструктурирање на телевизискиот сектор, како и намалување на бројот на вработени во правниот оддел и секторот за глобални односи.

Индустријата за забава под притисок

Дизни не е единствената компанија во индустријата за забава која посегнува по вакви мерки. И „Нетфликс“, „Парамаунт“ и „Ворнер брос“ во изминатиот период го намалија бројот на вработени.

Причините се поврзуваат со падот на приходите од традиционалната телевизија и забавувањето на растот на бројот на претплатници на стриминг-платформите.

Дополнителен предизвик е промената на навиките на публиката. Сè поголем број гледачи се насочуваат кон социјалните мрежи, онлајн-видеосодржините и стриминг-услугите зад кои стојат технолошки гиганти како „Амазон“ и „Епл“.

Овие промени ја принудуваат индустријата за забава да ги преиспита деловните модели, да ги намалува трошоците и да бара нови начини за привлекување публика.

Извор: b92.net