Грците ги очекуваат четиригодишни даночни олеснувања: Минималната плата ќе достигне 1.000 евра

Грчкиот премиер Кирјакос Мицотакис најави четиригодишен план за намалување на даноците и постепено зголемување на минималната плата, во обид да ја зајакне поддршката за неговата партија пред парламентарните избори во 2027 година.

Мицотакис планот го претстави во говорот на Меѓународниот саем во Солун, еден од најзначајните годишни политички и економски настани во Грција. Тој вети „скок во благосостојбата за сите“, пренесува „Еурактив“.

Даночни олеснувања за повеќе категории граѓани

Според најавите, даночни олеснувања ќе добијат земјоделците, самовработените, пензионерите и вработените во јавниот сектор.

Една од позначајните мерки е постепеното зголемување на минималната плата, која до 2028 година би требало да достигне 1.000 евра.

Посебно внимание е посветено на земјоделците, кои се соочија со сериозни проблеми поради доцнењето на исплатите поврзани со субвенциите од Европската Унија.

Мицотакис најави и укинување на данокот за граѓаните со годишни приходи под 20.000 евра.

За сточарите, пак, е предвидено воспоставување сеопфатен систем за долгорочна заштита од болести кај животните.

Штедни сметки за секое новороденче

Меѓу мерките што ги најави грчкиот премиер е и воведување орочени штедни сметки за секое новородено дете.

Владата со овие мерки се обидува да испрати порака дека економските придобивки ќе бидат почувствувани од различни категории граѓани, во период кога владејачката „Нова демократија“ се соочува со пад на поддршката.

Изборите се очекуваат во 2027 година

Редовните парламентарни избори во Грција треба да се одржат во 2027 година, иако во јавноста се појавуваат шпекулации дека гласањето би можело да биде организирано и порано.

Двајца претставници на грчката влада изјавиле за „Еурактив“ дека во моментов најверојатното сценарио е изборите да се одржат во средината на мај 2027 година, само неколку недели пред Грција во јули да го преземе ротирачкото претседателство со Советот на ЕУ.

Според најновите анкети, „Нова демократија“ тешко би можела да обезбеди апсолутно мнозинство и сама да формира влада. Поради тоа, како можна опција се споменуваат и избори во два круга.

Притисок врз „Нова демократија“ од десницата

Владејачката партија се соочува и со зголемен притисок од десниот политички спектар.

Поранешниот премиер Антонис Самарас подготвува формирање нова политичка партија, која би била насочена кон конзервативните гласачи.

Доколку новата политичка опција привлече значаен дел од десничарското гласачко тело, тоа би можело дополнително да ги намали шансите на „Нова демократија“ да обезбеди доволно мандати за самостојно формирање влада.

Извор: B92.net