Турист разочаран од летувањето на Јадранот: „Завршив со летувањата во Европа, жештините се неподносливи“

Иако потекнува од американската сојузна држава Флорида, позната по високите температури и големата влажност на воздухот, еден американски турист призна дека жештините во Хрватска целосно го исцрпиле.

Своето искуство го споделил пред десетина дена на Reddit, токму во екот на топлотниот бран.

Во објавата со наслов „Мислам дека завршив со европските лета“, тој објаснил дека по претходното патување во Западна Европа во јули, решил во иднина да избегнува патувања во текот на јули и август. Оваа година ја избрал Хрватска во јуни, надевајќи се на попријатни временски услови.

„Можеби звучи како да претерувам, но овој топлотен бран е навистина неподнослив. Веќе две недели немав можност вистински да се разладам и чувствувам како постепено ме исцрпува. Живеам на Флорида, која е позната по жешките и влажни лета, но ова е едноставно премногу“, напишал тој.

Дополнително посочил дека бил изненаден што, иако престојувал покрај морето, речиси и да немало ветер.

„Ако не сте во морето или под туш, практично нема начин да се разладите“, додал туристот.

Тој признава дека некои можеби ќе го сметаат за разгален или ќе кажат дека претерува, но нагласува дека многу патувал и дека со текот на годините сè потешко ги поднесува екстремните горештини.

„Овојпат не беше само чувство од типот ‘леле, колку е жешко’. Се потев толку многу што дури помислив дека кога ќе се вратам дома треба да одам на лекарски преглед“, напишал тој.

Стотици реакции на социјалните мрежи

Неговата објава предизвикала стотици коментари, а голем број корисници му дале поддршка. Многу Хрвати се согласиле дека не претерува и дека ова е еден од најтешките топлотни бранови што ги паметат во последните години.

„Не си разгален, целосно те разбирам. Ова е веројатно најлошиот крај на јуни што го паметам. Само од кратка прошетка надвор ми станува лошо. Пријатно е само ако си во сенка или покрај морето, но за каква било друга активност нема шанси“, напишал еден корисник.

Други предупредиле дека ваквите екстремни температури стануваат новата реалност.

„Најдепресивно е што ваквите топлотни бранови ќе стануваат сè почести и поинтензивни“, стои во еден од коментарите.

Голем број туристи потврдиле дека во последните години, поради високите температури, сè почесто ја избегнуваат јужна Европа во текот на летото. Иако порано ги избирале мај и јуни за патување, велат дека и тие месеци стануваат неподносливо жешки.

Според многумина, септември сега е најдобриот период за одмор, а сè попривлечен станува и април.

Извор: Blic.rs