Венецуела испраќа нафтена опрема во САД на ремонт: Се отвора патот за обновување на енергетската соработка
Венецуела за првпат по повеќе од десет години испрати опрема на својата државна нафтена компанија во Соединетите Американски Држави (САД) на ремонт и модернизација. Потегот претставува значаен чекор кон обновување на соработката со американските добавувачи, по долгогодишниот период на санкции и ограничувања.
Претседателот на венецуелската државна нафтена компанија PDVSA, Ектор Обрегон, кон крајот на октомври ја одобрил документацијата за испраќање четири гасни генератори и шест гасни компресори во сервисните капацитети на компанијата „Сименс Енерџи“ во Хјустон, САД, објави Б92, повикувајќи се на информации од Блумберг.
Опремата е испратена во Хјустон, а по завршувањето на ремонтот ќе биде користена во областа на езерото Маракаибо, во западниот дел на Венецуела. Станува збор за еден од најзначајните центри на нафтената индустрија во земјата.
Операцијата ја организирала компанијата „Норт Американ Блу Енерџи Партнерс“ (NABEP), предводена од Алехандро Бетанкур, кој се смета за еден од важните соработници на администрацијата на американскиот претседател Доналд Трамп за прашањата поврзани со Венецуела.
Трошоците за ремонтот се проценуваат на околу 46 милиони долари, додека работите би требало да траат меѓу три и шест месеци.
Од компанијата NABEP соопштиле дека обновувањето на нафтената инфраструктура се одвива на повеќе локации низ светот.
„Со претворање на дотраената опрема, која веднаш ни е достапна, во опрема според светски стандарди, можеме многу побрзо да го зголемиме производството“, наведуваат од компанијата.
Целта е зголемување на производството на нафта
Опремата е особено важна за обновување на производството во западниот дел на Венецуела, особено во регионот на езерото Маракаибо.
Ова подрачје претставува едно од најважните нафтени средишта во земјата, но нафтените полиња и бунарите со години се соочуваат со сериозно влошување поради недоволните инвестиции и недостигот од соодветно одржување.
Ремонтот е дел од поширокиот план на компанијата NABEP, која има цел до крајот на 2028 година да го зголеми производството на 500.000 барели нафта дневно.
Планот е поврзан со договор со американското Министерство за одбрана, кој опфаќа најмалку 17 нафтени полиња во регионот.
Според проценките на изворите запознаени со операцијата, поправената опрема би можела да овозможи зголемување на производството за најмалку 60.000 барели нафта дневно.
Испраќањето на опремата во САД се случува по повеќегодишниот период на санкции и ограничена економска соработка меѓу двете земји, а може да претставува и сигнал за постепено обновување на деловните врски во енергетскиот сектор.
