Зошто најмногу заминувања од компаниите се случуваат токму во јануари?

Јануари традиционално се смета за месец на нови почетоци, но истовремено е и период кога HR-статистиките бележат зголемен број откази. Иако на прв поглед може да изгледа нелогично вработените да ги напуштаат компаниите веднаш по празниците, причините за овој тренд се длабоко вкоренети во начинот на кој луѓето ја доживуваат работата, кариерата и личните приоритети.

Во текот на декември, многу вработени остануваат во компаниите од прагматични причини – ја чекаат исплатата на бонуси, завршувањето на годината или едноставно сакаат „уште малку да издржат“ до празниците. Тој период често служи како тивка фаза на размислување, во која се преиспитуваат професионалните избори и долгорочните планови. Кога празниците ќе поминат и секојдневието ќе се врати, незадоволството кое било потиснато излегува на површина.

Јануари – соочување со реалноста

Јануари така станува момент на соочување со реалноста. Нови цели, нови стратегии и често истите проблеми од претходната година кај вработените можат да создадат чувство дека суштински ништо не се менува. Доколку во текот на изминатата година постоеле знаци на согорување, лоша комуникација или изостанок на напредување, почетокот на новата година само дополнително ги нагласува.

Психолошкиот аспект исто така игра голема улога. Новата година симболизира можност за промена, а заминувањето од компанија се доживува како конкретен чекор кон „подобро утре“. Многу вработени тогаш одлучуваат повеќе да не ја одложуваат одлуката која со месеци ја преиспитувале. Во исто време, пазарот на труд во јануари повторно се активира – компаниите објавуваат нови огласи, а регрутерите се поподготвени за разговори.

За работодавачите, јануарскиот бран на заминувања претставува сериозен предизвик, но и важен сигнал. Наместо да се гледа како неизбежен тренд, тој може да биде повод за анализа – зошто луѓето си заминуваат, дали нивните очекувања биле неисполнети и што може да се промени. Компаниите кои активно работат на задржување на талентите, преку јасни кариерни патеки, транспарентна комуникација и грижа за вработените, многу полесно го поминуваат овој период.

На крајот, јануари не мора да биде месец на заминувања. Тој може да стане месец на нови договори, редефинирање на односите меѓу вработените и работодавачите и почеток на година во која луѓето избираат да останат – не затоа што мораат, туку затоа што сакаат.

Извор: BIZLife.rs