Дали ќе има намалување на бројот на работници во преработувачката индустрија?

Според оценките на раководителите на компаниите во преработувачката индустрија, индикаторот на доверба во наведената индустрија во јануари 2021 година е зголемен за 0,1 процентен поен во однос на декември 2020 година и изнесува 13,8, додека во однос на јануари 2020 година е намален за 8,8 процентни поени, стои во соопштението на Државниот завод за статистка.

„Состојбата на обезбеденоста на производството со порачки во јануари 2021, во однос на декември 2020 година, е поповолна, очекувањата за обемот на производството во наредните три месеци се поповолни во однос на претходниот месец, а залихите на готовите производи се зголемени.

Оценката за економската состојба на деловните субјекти во јануари 2021 година е поповолна во однос на претходниот месец, а понеповолна во однос на јануари 2020 година. Се очекува бројот на вработените да се намали.

Просечното искористување на капацитетите на деловните субјекти во јануари 2021 година изнесува 69.4 % од нормалното искористување.

Најголемо влијание врз ограничувањето на обемот на производството имаат следните фактори: недоволната странска побарувачка со 21.7 %, неизвесното економско опкружување со 16.6 %, недостигот на квалификувана работна сила со 15.8 % и недоволната домашна побарувачка со  14.5 %“, се наведува во соопштението на ДЗС.