Половина од работниците на Дојче Бан на улица: Планирале заштеди на грбот на вработените

Германскиот железнички товарен превозник DB Cargo планира да укине 6.200 работни места во рамки на сеопфатно реструктурирање на работењето и излез од „минус“, изјави извршниот директор Бернхард Озбург.

Според Озбург, DB Cargo ќе укине 6.200 од околу 14.000 работни места со полно работно време во Германија, во речиси сите сектори, вклучувајќи превоз, планирање, администрација, продажба и ИТ.

Намалувањето на бројот на работни места е дел од поширок план за реструктурирање на подружницата на германската државна железничка група Дојче Бан (Deutsche Bahn).

Европската комисија ја одобри помошта од германската држава за DB Cargo под услов до крајот на 2026 година да се постават темелите за долгорочно самостојно и одржливо работење.

Компанијата во првата половина од минатата година оствари оперативна загуба од 96 милиони евра.

И претходничката на Озбург на челната позиција во DB Cargo, Сигрид Никута, се обиде да го реструктурира работењето, но се повлече откако независните ревизори негативно го оценија нејзиниот план за закрепнување.

Озбург сега претстави среднорочна стратегија која се темели на четири столба и треба да се спроведе до 2030 година. Независната ревизорска оценка се очекува до крајот на месецот, а вработените и надзорниот одбор беа информирани оваа недела.

Со оглед на слабеењето на побарувачката од клучните германски клиенти во автомобилскиот, хемискиот и челичниот сектор, DB Cargo планира да го пренасочи фокусот кон други европски пазари.

Компанијата исто така има намера да ги намали трошоците за околу една милијарда евра до 2030 година, вклучувајќи укинување на 4.000 работни места, поедноставување на административните процеси и подобрување на ефикасноста на возниот парк.

Дополнителни 2.000 работни места ќе бидат укинати во товарниот транспорт со „скратени“ композиции, кој ќе биде реорганизиран.

Дури и со новата структура, тој дел од работењето би остварувал загуби и би зависел од поддршката на сојузната држава, напомена Озбург.

Извор: b92.net