17 септември – Светски ден на безбедноста на пациентите
17 септември се одбележува како Светски ден на безбедноста на пациентите, со цел да се подигне глобалната свест за значењето на безбедната и квалитетна здравствена заштита и да се поттикнат конкретни активности за намалување на ризиците за пациентите.
Овој ден претставува повик за глобална солидарност и заедничко дејствување на земјите и меѓународните партнери во насока на унапредување на безбедноста на пациентите во здравствените системи.
Во одбележувањето се вклучуваат пациенти и нивните семејства, здравствените работници, негувателите, заедниците, раководителите на здравствените установи и креаторите на политики. Заедничката цел е да се истакне важноста на безбедноста како основен дел од квалитетната здравствена грижа.
Светскиот ден на безбедноста на пациентите е воспоставен врз основа на резолуцијата WHA 72.6 „Глобална акција за безбедноста на пациентите“, усвоена од Светската здравствена организација. Со резолуцијата безбедноста на пациентите е препознаена како глобален здравствен приоритет, а 17 септември е определен како датум за негово годишно одбележување.
Безбедноста на пациентите подразбира создавање здравствен систем во кој ризиците од грешки, пропусти и други несакани настани се препознаваат, спречуваат и намалуваат. Таа бара континуирано унапредување на практиките, отворена комуникација и активно учество на сите кои се дел од процесот на здравствена заштита.
Светскиот ден е можност дополнително да се истакне дека безбедноста на пациентите е заедничка одговорност и дека подобрувањето на здравствената грижа бара соработка меѓу пациентите, здравствените работници, институциите и целото општество.
