Африка добива пореална големина на светските карти: ОН ја поддржаа промената, само САД гласаа против

Обединетите нации поддржаа користење на мапа која пореално ја прикажува вистинската големина на континентите, особено на Африка, која на традиционалните карти често изгледа значително помала отколку што е во реалноста.

Генералното собрание на ОН гласаше со 164 гласа „за“ и само еден „против“ за резолуцијата со која земјите членки се поттикнуваат да ја користат проекцијата „Equal Earth“, наместо широко распространетата Меркаторова проекција.

Единствената земја што гласаше против беа Соединетите Американски Држави.

Зошто Африка изгледа помала на традиционалните карти?

Меркаторовата проекција се користи со векови, но има една важна карактеристика – значително ги зголемува областите што се наоѓаат подалеку од екваторот.

Поради тоа, на класичната карта Гренланд може да изгледа речиси колку Африка, иако Африка по површина е повеќекратно поголема.

Токму овој проблем се обидува да го реши проекцијата „Equal Earth“. Таа е дизајнирана така што односот меѓу површините на континентите е многу поблизок до нивната вистинска големина.

ОН не наредија промена на сите карти

И покрај убедливиот резултат на гласањето, резолуцијата на ОН не е правно обврзувачка.

Тоа значи дека Меркаторовата проекција нема автоматски да биде заменета на сите карти во светот.

Целта на резолуцијата е да ги поттикне државите, образовните институции и другите корисници да размислат за употреба на картографски проекции кои пореално ја прикажуваат големината на копнените површини.

Кампањата за промена на начинот на кој Африка се прикажува на светските карти ја предводеа африкански земји. Тие со години укажуваат дека традиционалните карти создаваат искривена претстава за големината на континентот.

САД против резолуцијата

Американската администрација се спротивстави на резолуцијата, оценувајќи ја иницијативата како „радикален идеолошки проект“.

И покрај противењето на Вашингтон, гласањето заврши со убедливи 164 гласа „за“ наспроти еден „против“.

Промената, сепак, не значи дека Африка физички „ќе стане поголема“ на сите карти, туку дека со изборот на поинаква картографска проекција нејзината површина ќе биде прикажана во сооднос што е поблизок до реалноста.

Извор: BIZLife