Дали емпатијата се учи? Во Данска тоа е задолжително!

Многу земји се обидуваат да го решат проблемот со врсничкото насилство, но Данска пронајде подиректен пристап. Во училиштата, наставата по емпатија наречена Klassen tid е задолжителна, а овие часови се подеднакво важни како и часовите по јазик или математика.

Во изминатите десет години, Данска често се наоѓа на листите на најсреќни земји во светот. Научниците ова го поврзуваат со добриот животен стандард кој им овозможува на граѓаните да се фокусираат и на други аспекти од животот. Во нивниот образовен систем, наставата по емпатија е задолжителна за сите деца од 6 до 16 години.

💡 Како изгледа учењето на емпатија?

За време на Klassen tid, учениците разговараат за своите проблеми, без разлика дали се поврзани со училиштето или не, а целиот клас, заедно со наставникот, се обидува да најде решение засновано на слушање и разбирање.

Ако нема проблеми за разговор, децата едноставно поминуваат време заедно, опуштајќи се и уживајќи во hygge (хуга), збор кој не може буквално да се преведе, бидејќи е феномен тесно поврзан со данската култура.

Hygge може да се дефинира како „намерно создадена интимност“. Во земја каде што рано се стемнува, врне и е сиво, hygge значи внесување светлина, топлина и пријателство, создавање заедничка, гостопримлива и интимна атмосфера.

Тоа е фундаментален концепт за данското чувство на благосостојба. Исто така, стана и глобален феномен: Amazon продава повеќе од 900 книги за hygge, а Instagram има повеќе од 3 милиони објави со хаштагот #hygge. Децата во Данска растат во атмосфера која подеднакво ги цени емпатијата и интелигенцијата.

🤔 Дали емпатијата може да се научи?

Психолозите честопати се прашувале на кој начин се развива емпатијата кај децата и како некои деца природно имаат поголем капацитет за неа. Одговорот е дека емпатијата е и вродена и научена, при што биолошките „алатки“ обезбедуваат основа која потоа се развива преку животните искуства и социјалните интеракции.

Луѓето се раѓаат со способност за емпатија, како што е способноста да ги имитираат другите, што е претходник на разбирањето и споделувањето на чувствата.

Извор: BIZLife

Фото: Freepik