Работата од дома станува минато? Шефовите ги сакаат вработените назад во канцеларија

Младата генерација има јасен став кога станува збор за работа од далечина. Дури 35% од младите на возраст од 16 до 24 години преферираат работа од дома, а за 40% тоа е клучен критериум при избор на работното место.

За време на пандемијата на коронавирусот, работата од дома стана нова реалност за милиони вработени кои своите канцеларии ги заменија со кујнски маси и дневни соби. Години подоцна, многумина се навикнаа на стекнатата слобода, но сè поголем број работодавачи сакаат да ги вратат тимовите во канцеларија, пренесува PD.

Колку луѓе денес навистина работат од дома?

Најновата анализа на платформата за кариера Zety покажува дека, и покрај желбата на работодавачите за враќање во канцеларија, голем дел од вработените и понатаму работат на далечина. Во моментов, 23,5% од вработените редовно работат од дома, од кои 13,2% секојдневно.

За споредба: во периодот на карантинот во 2020 година овој процент изнесувал 27%, додека пред пандемијата бил само околу 12%. Најчесто од дома работат:

• ИТ стручњаци,
• самовработени лица (39%),
• менаџери и раководители (40,5%).

Предности на работата од далечина

Кајо Сампајо, автор на платформата Zety и сертифициран советник за кариера, ги објаснува придобивките од овој модел на работа:

„Работата од дома им овозможува на вработените да спијат подолго, да избегнат секојдневно патување до работа и да земат пауза кога навистина им е потребна. Тоа го зголемува задоволството, ја зајакнува лојалноста кон компанијата и помага во превенција на синдромот на прегорување (burn-out). На крајот, тоа може да го намали бројот на денови на боледување и да ја зголеми продуктивноста.“

Стравот на работодавачите

Од друга страна, работодавачите стравуваат од пад на ефикасноста кога вработените не се под директен надзор во канцеларија. Иако релевантни студии не покажуваат општ пад на продуктивноста, загриженоста е очигледна.

Во САД, на пример, три од четири компании признаваат дека користат дигитални алати за надзор – од следење на активностите на екран до бележење на движењата на глувчето.

Важно е да се напомене дека законската рамка не е секогаш на страната на вработените. Според германското работно право, на кое се повикува оригиналниот текст, не постои општо законско право на работа од дома. Оваа можност зависи исклучиво од договорот со работодавачот, односно дали е дефинирана во индивидуалниот договор за работа или во колективен договор.

Извор: BIZlife.rs